Россия меҳнат мигрантлари учун янги талабларни жорий этди
Янги қонунга кўра, мигрантлар ўзлари ва қарамоғидаги оила аъзоларини яшаш минимумидан кам бўлмаган даромад билан таъминлаши шарт бўлади.
Россия Президенти Владимир Путин меҳнат мигрантлари учун қўшимча талабларни назарда тутувчи қонунни имзолади.
Ҳужжатга мувофиқ, Россияда ишлаётган хорижий фуқаролар ўзлари ҳамда мамлакатда яшаётган қарамоғидаги оила аъзоларини минтақавий коэффитсиент ҳисобга олинган яшаш минимумидан кам бўлмаган даромад билан таъминлаши шарт бўлади.
Агар ушбу талаб бажарилмаса, мигрантнинг патенти ёки ишлаш рухсатномаси узайтирилмайди. Бундай ҳолатда улар, жумладан, вояга етмаган фарзандлари билан 15 кун ичида Россияни тарк этиши талаб этилади.
Қонунга кўра, мигрантларнинг даромадлари солиқ органлари томонидан назорат қилинади. Солиқ хизмати уларнинг даромадлари ҳақидаги маълумотларни ҳар чорак якунлари бўйича Россия Ички ишлар вазирлигига автоматик равишда тақдим этади. Шунингдек, мигрантларнинг ўзи ҳам ҳар йили даромадини тасдиқловчи ҳужжатларни тақдим этиши лозим бўлади.
Янги тартиб вақтинчалик яшаш ва доимий яшаш рухсатномаларини бекор қилиш асосларини ҳам кенгайтиради. Даромад тўғрисидаги маълумот тақдим этилмаса ёки жон бошига тўғри келадиган даромад белгиланган минимумдан паст бўлса, мигрантнинг Россияда қолиш муддати қисқартирилиши мумкин.
Бундан ташқари, қонунга кўра, мигрантларнинг фарзандлари Россияда фақат ота-онасининг ишлаш рухсатномаси амал қилган даврда яшаши мумкин. 18 ёшга тўлган мигрант фарзандлари эса 30 кун ичида мамлакатни тарк этиши ёки патент олиш учун мурожаат қилиши шарт.
Мазкур қонун 2027 йил 1 январдан кучга киради. Айрим нормалар, жумладан, мигрантлар даромади ҳақидаги маълумотларни Ички ишлар вазирлигига электрон тарзда тақдим этиш тартиби эса 2026 йил 1 октябрдан амал қила бошлайди.
