Россия урушни бошламаган — Путин
Россия президентининг айтишича, Москва Украинадаги урушни бошламаган, балки Киев томонидан бошланган ҳарбий ҳаракатларга жавоб қайтарган.
Россия президенти Владимир Путин Россия Украинадаги урушни бошламаганини, балки Киев томонидан бошланган ҳарбий ҳаракатларга жавоб қайтарганини таъкидлади.
Путин ушбу баёнотни Ҳарбий-денгиз кучлари куни муносабати билан Санкт-Петербург шаҳрида Россия ҳарбий-денгиз флоти хизматчилари билан учрашув чоғида билдирган.
Россия президенти сўзларига кўра, Москва ҳарбий амалиётларни бошламаган, балки унинг таъкидлашича, Ғарб кўмагидаги Киев ҳукумати томонидан Украинанинг жануби-шарқида олиб борилган ҳарбий ҳаракатларга жавоб берган.
“Биз ҳеч қандай уруш бошламадик. Биз шунчаки Киев режими томонидан Ғарб кўмагида бошланган, ўша пайтдаги жануби-шарқий Украинага қарши ва Россияга йўналтирилган ҳарбий ҳаракатларга жавоб бера бошладик”, — деди Владимир Путин.
Мазкур баёнот Россия президентининг Украинадаги можаро юзасидан навбатдаги расмий позицияси сифатида янграган. Украина ва Ғарб давлатлари эса можаронинг келиб чиқиши бўйича Россия томонидан билдирилаётган бу талқинларни рад этиб келади.
