Сурхондарёда боғча мудираси 14 млн сўм пора билан ушланди
У озиқ-овқат маҳсулотлари қабул қилинганини тасдиқловчи ҳужжатларга имзо қўйиш эвазига тадбиркордан пул талаб қилган.
Сурхондарё вилоятининг Жарқўрғон туманида давлат мактабгача таълим ташкилоти раҳбари 14 миллион сўм пора олаётган вақтида қўлга олинди.
Сурхондарё вилояти ИИБ ахборот хизматининг маълум қилишича, боғча мудираси ўзи раҳбарлик қилаётган ҳамда яна бир мактабгача таълим ташкилотига шартнома асосида етказиб берилган озиқ-овқат маҳсулотлари тўлиқ қабул қилинганини тасдиқловчи 10 кунлик ҳисоботларга имзо ва муҳр қўйиб бериш эвазига тадбиркордан пул талаб қилган.
Дастлабки маълумотларга кўра, у ҳар бир боғча учун 7 миллион сўмдан, жами 14 миллион сўм сўраган.
Жорий йилнинг 20 июль куни Ички ишлар органлари ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбир давомида гумонланувчи талаб қилинган пул маблағларини олаётган вақтида ашёвий далиллар билан ушланган.
Мазкур ҳолат юзасидан гумонланувчи ва бошқа шахсларга нисбатан Жиноят кодексининг 210-моддаси 2-қисми ("пора олиш") билан жиноят иши қўзғатилган. Ҳозирда тергов ҳаракатлари давом эттирилмоқда.
