“Ҳудудий электр тармоқлари” раҳбари ишдан олинди
Янги энергетика вазири, “Ҳудудий электр тармоқлари”нинг янги раҳбари ҳамда Энергия инспекциясининг янги бошлиғи бугундан бошлаб мутлақо янгича иш услубини йўлга қўйиши лозимлиги таъкидланди.
Президент Шавкат Мирзиёев раислигидаги видеоселектор йиғилишида энергетика тизимидаги жиддий камчиликлар танқид қилиниб, қатор раҳбарларга нисбатан кадрлар бўйича қарорлар қабул қилинди.
Йиғилишда Сурхондарё вилоятида қурилаётган буғ-газ электр станцияси учун жой нотўғри танлангани қайд этилди. Таъкидланишича, бунинг оқибатида станцияга газ етказиб бериш учун қўшимча 300 миллион доллар сарфлаш зарурати юзага келган.
Шунингдек, ташаббускор билан тузилган шартнома шартлари етарлича пухта ўрганилмагани қўшимча харажатлар юзага келиши хавфини оширгани таъкидланиб, масъулларга ҳужжатларни қайта кўриб чиқиш топширилди.
Тизимдаги жиддий камчиликлар учун энергетика вазири ҳамда “Ҳудудий электр тармоқлари” раҳбари лавозимидан озод этилди.
Бундан ташқари, “Миллий электр тармоқлари”, “Иссиқлик электр станциялари”, «Трансгаз» ва «Ҳудудгаз» раҳбарларига йил якунигача синов муддати белгиланди. Давлат раҳбари натижа бўлмаган тақдирда улар ҳам лавозимидан озод этилиши ҳақида огоҳлантирди.
Йиғилишда янги энергетика вазири Шерзод Ходжаев, “Ҳудудий электр тармоқлари”нинг янги раҳбари Сардор Исақулов ҳамда Энергия инспекциясининг янги бошлиғи Ахад Исоқжонов бугундан бошлаб мутлақо янгича иш услубини йўлга қўйиши лозимлиги таъкидланди.
Президент, шунингдек, ҳудудлар раҳбарлари ҳам энергетика масалаларига бефарқ бўлиб ўтира олмаслигини қайд этди.
“Ҳокимлар ҳам 'Бу энергетикларнинг ишиʼ деб хотиржам ўтиришга ҳаққи йўқ. Сўров қаттиқ бўлади”, — деди давлат раҳбари.
