Ўзбекистонда 6 ойда қарийб 25 мингта никоҳ бекор қилинди
Мамлакатда ярим йилда 92 мингдан ортиқ никоҳ тузилган.
2026 йилнинг январ–июнь ойларида Ўзбекистонда 92,3 мингта никоҳ ва 24,8 мингта никоҳдан ажралиш ҳолати қайд этилди. Бу ҳақда Миллий статистика қўмитаси маълум қилди.
Қайд этилишича, 2026 йил 1 июль ҳолатига Ўзбекистоннинг доимий аҳолиси сони жорий ҳисоб-китобларга кўра 38 миллион 519,5 минг нафарни ташкил этган.
Шундан 19 миллион 400,6 минг нафари эркаклар, 19 миллион 118,9 минг нафари аёллар ҳиссасига тўғри келади. Аҳолининг 19 миллион 608,9 минг нафари шаҳарларда, 18 миллион 910,6 минг нафари эса қишлоқ ҳудудларида истиқомат қилмоқда.
Статистик маълумотларга кўра, 2026 йилнинг дастлабки олти ойида республика бўйича 92,3 мингта никоҳ қайд этилган, 24,8 мингта никоҳдан ажралиш ҳолати эса давлат рўйхатидан ўтказилган.
Ташқи миграция кўрсаткичларига кўра, ҳисобот даврида 1 минг 649 киши Ўзбекистонга кўчиб келган, 5 минг 422 киши эса чет давлатларга кўчиб кетган.
Миллий статистика қўмитаси таъкидлашича, аҳолини рўйхатга олишнинг якуний натижалари эълон қилингач, мамлакатнинг доимий аҳолиси сони айнан ушбу маълумотлар асосида расман тасдиқланади.
