АҚШ ҳарбийлари Трампни ракета захиралари камайгани ҳақида огоҳлантирди — АP
Стратегик ўқ-дорилар захирасининг камайиши АҚШнинг ҳарбий имкониятларига таъсир қилиши мумкин.
АҚШ Қуролли кучлари раҳбарияти президент Доналд Трампни стратегик ракета ва ўқ-дорилар захиралари ҳолати бўйича ёпиқ брифингда хабардор қилди.
Associated Press агентлиги манбаларига кўра, АҚШ Қуролли Кучлари штаб бошлиқлари қўмитаси раиси Ден Кейн президент Доналд Трампга мавжуд ракета захиралари Вашингтоннинг Эронга нисбатан эҳтимолий ҳарбий ҳаракатларини кенгайтириш имкониятини чеклаши мумкинлиги ҳақида маълумот берган.
Хабарда айтилишича, ракета ва бошқа ўқ-дорилар захирасига оид ҳисобот президентга Эронга қарши эҳтимолий ҳарбий операциялар бўйича турли сценарийлар билан биргаликда тақдим этилган.
АP маълумотига кўра, ҳарбий мутахассислар мавжуд захиралар кейинги эҳтимолий операцияларни режалаштиришда муҳим омил бўлиб қолаётганини таъкидлаган.
Аввалроқ The New York Times газетаси Доналд Трамп Эронга қарши ҳарбий ҳаракатларни кенгайтиришни ракета захиралари, жумладан ҳаво мудофааси тизимлари учун мўлжалланган ракеталар етишмаслиги сабабли ортга сурганини ёзган эди. Бироқ Трамп кейинчалик бу маълумотларни рад этган.
