“Чинор” метро бекати 29 июлдан фаолиятини қайта бошлайди
Реконструкциядан сўнг бекатдаги кунлик хизмат кўрсатиш қуввати 40 минг нафаргача оширилди.
Тошкент метрополитенининг реконструкция қилинган «Чинор» метро бекати 29 июлдан яна йўловчиларга хизмат кўрсатишни бошлайди.
Тошкент метрополитени маълум қилишича, «Чинор» метро бекатида олиб борилган реконструкция ва кенгайтириш ишлари якунланган. Шу муносабат билан бекат 29 июль куни соат 05:00 дан бошлаб йўловчилар учун тўлиқ фаолиятини қайта бошлайди.
Қайд этилишича, реконструкция ишлари Ўзбекистон Республикаси Вазирлар Маҳкамасининг 2026 йил 30 апрелдаги йиғилиши баённомаси асосида белгиланган топшириқлар ижроси доирасида амалга оширилган.
Янгилаш жараёнида бекатнинг кириш ва чиқиш ҳудудлари сезиларли даражада кенгайтирилган. Турникетлар сони 6 тадан 13 тага етказилган, йўловчилар ҳаракатига қулайлик яратиш мақсадида ўтиш йўлаклари қайта лойиҳалаштирилди ҳамда бекатдан бекатга тўғридан тўғри ўтиш имконияти яратилган.
Шунингдек, реконструкция натижасида бекатнинг хизмат кўрсатиш қуввати сезиларли даражада ошган. Аввал кунига ўртача 15 минг нафар йўловчига хизмат кўрсатган бекат эндиликда 35–40 минг нафаргача йўловчини қабул қилиш имкониятига эга бўлди.
