Россия ва Шимолий Корея янги стратегик йўлакни якунламоқда
Айрим таҳлилчилар кўприк ҳарбий юкларни ташиш учун муҳим йўлакка айланиши мумкинлигини билдирмоқда.
Россия ва Шимолий Корея Туман дарёси устидан ўтувчи тарихдаги илк автомобиль кўприги қурилишини якунлаш арафасида. Кўприк Россиянинг Хасан шаҳарчаси билан Шимолий Кореянинг Туманган ҳудудини боғлайди. Бу ҳақда The Guardian хабар берди.
Лойиҳа 2024 йилда Россия президенти Владимир Путин ва Шимолий Корея етакчиси Ким Чен Ин имзолаган стратегик ҳамкорлик шартномасидан сўнг бошланган. Узунлиги қарийб 1 километр, эни эса 7 метр бўлган икки полосали кўприк деярли битган. Бироқ Россия томонидаги божхона ва чегара инфратузилмаси ҳали тўлиқ тайёр эмаслиги сабабли унинг очилиши кечикмоқда.
Москва ва Пхенян лойиҳа икки давлат ўртасидаги савдо, логистика ва туризмни ривожлантиришини билдирмоқда. Аммо Британиянинг The Guardian нашри эълон қилган ва украиналик Truth Hounds ташкилоти тайёрлаган тадқиқотга кўра, кўприкнинг асл аҳамияти ҳарбий логистика билан боғлиқ бўлиши мумкин. Таҳлилчиларнинг фикрича, автомобиль транспорти орқали юкларни ташиш темирйўлга қараганда сунъий йўлдош кузатувидан яшириш осонроқ.
Ҳисоботда қайд этилишича, кўприк Шимолий Корея ҳарбийлари, қурилиш бригадалари ва расмийларини Россияга тезроқ олиб ўтиш, шунингдек, Россиядан технологиялар ва бошқа юкларни Шимолий Кореяга етказишни осонлаштириши мумкин. Таҳлилчиларга кўра, бу Россия ва Шимолий Корея ўртасидаги ҳарбий ҳамкорликни янада мустаҳкамлашга хизмат қилади.
