Швейцария суди Гулнора Каримовага оид ишни тўхтатди
Суд иши бўйича Ломбард Одиер банки жаримага тортилди, собиқ ходимга эса икки йиллик шартли қамоқ жазоси тайинланди.
Швейтсария Федерал Жиноят суди Гулнора Каримова иши доирасида Женевада жойлашган Lombard Odier хусусий банкини пул ювишнинг олдини олиш бўйича етарли чоралар кўрмаганлик учун 3 миллион Швейтсария франки миқдорида жаримага тортди.
Суд қарорига кўра, банкнинг собиқ ходими оғир пул ювиш жиноятида айбдор деб топилиб, унга 2 йиллик шартли қамоқ жазоси тайинланди.
Шу билан бирга, Гулнора Каримовага нисбатан олиб борилган жиноят иши процессуал сабабларга кўра тўхтатилди. Суд унинг айбдорлиги ёки айбсизлиги юзасидан ҳуқуқий баҳо бермаган ҳамда айбловларнинг мазмунини кўриб чиқмаган. Шу сабабли ушбу қарор оқлов ҳукми ҳисобланмайди.
Суд материалларига кўра, Lombard Odier банки «Офис» деб аталган ва тергов томонидан жиноий тузилма сифатида баҳоланган тизим билан боғлиқ ҳисобварақлар юзасидан пул маблағларининг келиб чиқишини етарли даражада текширмаган. Тергов версиясига кўра, мазкур маблағлар Ўзбекистондаги телекоммуникация лойиҳалари билан боғлиқ коррупцион тўловлар орқали шаклланган.
Биринчи инстанция суди, шунингдек, 400 миллион Швейтсария франкидан ортиқ активларни мусодара қилиш ҳақида қарор чиқарди. Ушбу маблағларнинг якуний тақдири ҳукм қонуний кучга кириши ва эҳтимолий апелляция натижаларига боғлиқ бўлади.
Lombard Odier банки суд қарори устидан шикоят қилишини маълум қилиб, ўша даврда пул ювишга қарши зарур ички назорат механизмлари амалда бўлганини таъкидлаган.
Эслатиб ўтамиз, Швейтсария ва Ўзбекистон ўртасида аввал Гулнора Каримова билан боғлиқ мусодара қилинган активларнинг бир қисмини БМТнинг махсус ишонч жамғармаси орқали Ўзбекистонга қайтариш бўйича келишувлар имзоланган. Мазкур маблағлар таълим, соғлиқни сақлаш ҳамда ижтимоий лойиҳаларни молиялаштиришга йўналтирилиши белгиланган.
