Собиқ ИИВ ўринбосари Бекмурод Абдуллаев иши судга оширилди
У давлат мулкини ўзлаштириш билан боғлиқ бир қатор моддалар бўйича айбланмоқда.
Ички ишлар вазирининг собиқ ўринбосари Бекмурод Абдуллаев ва яна 30 кишига оид жиноят иши судга оширилди.
Суд ишлари жадвалига кўра, мазкур иш Жиноят ишлари бўйича Янгиҳаёт туман судида кўриб чиқилади. Дастлабки суд мажлиси 29 июль кунига белгиланган.
Бекмурод Абдуллаев Жиноят кодексининг 167-моддаси (ўзлаштириш ёки растрата йўли билан талон-торож қилиш)нинг бир қатор қисм ва бандлари бўйича айбланмоқда. Иш доирасида яна 30 нафар судланувчи жавобгарликка тортилган бўлиб, уларнинг аксарияти ҳам мазкур модданинг тегишли бандлари билан айбланмоқда.
Судланувчилар орасида Жазони ижро этиш департаментининг собиқ бошлиғи Рустам Турсунов ҳам бор. У ўзлаштириш ёки растрата йўли билан талон-торож қилиш, шунингдек, мансаб ваколатини суиистеъмол қилиш билан боғлиқ моддалар бўйича айбланмоқда.
Маълумот учун, генерал-майор Бекмурод Абдуллаев 2021 йил апрелидан Ички ишлар вазири ўринбосари – Жамоат хавфсизлиги департаменти бошлиғи лавозимида фаолият юритган. У 2025 йил ноябрь ойида лавозимидан озод этилган, 2026 йил январида эса давлат мулкини йирик миқдорда талон-торож қилишда гумонланиб қамоққа олинган эди.
Аввалроқ Президент раислигидаги йиғилишда Ички ишлар вазирлиги тизимидаги давлат харидлари орқали 186 миллиард сўм бюджет маблағи ўзлаштирилгани маълум қилинган эди.
