Тошкентда спа-салон ниқоби остида одам савдоси билан шуғулланган жиноий гуруҳ фош этилди
Гуруҳ қизларни иш ваъдаси билан жалб қилиб, уларни зўравонлик ва таҳдид орқали жинсий эксплуатацияга мажбурлаган.
Тошкент шаҳрининг Миробод туманида спа-салон ниқоби остида одам савдоси ва жинсий эксплуатация билан шуғулланган жиноий гуруҳ фаолиятига чек қўйилди.
Тошкент шаҳар Ички ишлар бош бошқармасининг маълум қилишича, гумонланувчилар турли иш ваъдалари билан икки нафар қизни жалб қилиб, уларни эркига зид равишда салонда ушлаб турган ҳамда таҳдид ва зўравонлик орқали мижозларга интим хизмат кўрсатишга мажбурлаган. Шу йўл билан улар ноқонуний даромад орттиргани аниқланган.
Жабрланувчиларнинг кўрсатмаларига кўра, уларга нисбатан жисмоний ва руҳий босим ўтказилган, қаршилик кўрсатган ҳолларда калтакланган, таҳдид қилинган ҳамда муассасани тарк этишларига йўл қўйилмаган.
Тезкор тадбир давомида яна етти нафар аёлнинг ҳам массаж хизмати ниқоби остида фоҳишалик билан шуғулланиб келгани аниқланган. Гумонланувчилар интим хизмат кўрсатиш эвазига 320 АҚШ доллари ва 6 миллион 250 минг сўм олаётган вақтида ашёвий далиллар билан қўлга олинган. Ҳодиса жойидан олинган далилий ашёлар белгиланган тартибда расмийлаштирилган.
Мазкур ҳолат юзасидан гумонланувчиларга нисбатан Ўзбекистон Республикаси Жиноят кодексининг 135-моддаси 2-қисми (одам савдоси) билан жиноят иши қўзғатилган. Ҳозирда тергов ҳаракатлари давом эттирилмоқда. Ҳуқуқни муҳофаза қилувчи органлар бундай турдаги жиноятларга қарши тезкор тадбирлар изчил давом эттирилишини маълум қилди.
