Ўзбекистонда ҳарбий форма кўринишидаги кийимларни кийганлик учун жарима жорий этилади
Фуқароларни чалғитувчи ва давлат органлари обрўсига путур етказиши мумкин бўлган формали кийимлардан фойдаланишга қарши қонун лойиҳасини маъқулланди.
Олий Мажлис Қонунчилик палатаси давлат органлари ходимларининг ҳарбий ва идоравий формали кийим-бошидан ноқонуний фойдаланиш ҳолатларининг олдини олишга қаратилган қонун лойиҳасини биринчи ўқишда қабул қилди.
Қайд этилишича, давлат органлари, вазирлик ва идоралар ходимлари учун белгиланган формали кийим-бош уларнинг хизмат ваколатини ифодаловчи муҳим рамз ҳисобланади. Бундай кийим фуқароларда ишонч уйғотиши, шунингдек, уни кийиб юрган шахсга қонун билан белгиланган ваколат ва масъулият юкланганини англатади.
Сўнгги йилларда айрим ташкилотлар ҳамда фуқаролар томонидан тасдиқланган ҳарбий ёки идоравий формага адаштириб юбориш даражасида ўхшаш кийимлардан фойдаланиш ҳолатлари кузатилаётгани қайд этилди. Бу эса фуқароларни чалғитиши, давлат органлари нуфузига салбий таъсир кўрсатиши ҳамда айрим шахсларнинг ўзини давлат хизматчиси сифатида кўрсатиб, фуқаролар ишончини суиистеъмол қилишига шароит яратиши мумкинлиги таъкидланди.
Шу муносабат билан Маъмурий жавобгарлик тўғрисидаги кодексга давлат органларининг тасдиқланган ҳарбий ёки идоравий формали кийим-бошига адаштириб юбориш даражасида ўхшаш, шунингдек, унга хос фарқловчи белгилар ёки рамзларга эга кийимларни жорий этганлик ёки улардан фойдаланганлик учун маъмурий жавобгарлик белгилаш таклиф этилмоқда.
Депутатлар муҳокамалар давомида қонун лойиҳаси юзасидан ўз фикр ва таклифларини билдириб, айрим нормаларни янада такомиллаштириш зарурлигини қайд этди. Якунда ҳужжат биринчи ўқишда қабул қилинди.
