Жанубий Кореянинг собиқ президенти яна 18 ойлик қамоқ жазосига ҳукм қилинди
Умрбод қамоқ жазосини ўтаётган Юн Сок Ёл сайлов қонунчилигини бузганлик бўйича ҳам айбдор деб топилди.
Жанубий Корея суди собиқ президент Юн Сок Ёлни сайлов қонунчилигини бузганликда айбдор деб топиб, унга қўшимча 18 ойлик қамоқ жазоси тайинлади.
Reuters хабарига кўра, тергов органлари Юн Сок Ёлни 2022 йилги президентлик сайловлари кампанияси давомида ёлғон маълумот берганликда айблаган. Суд уни айбдор деб топиб, қўшимча равишда бир ярим йил муддатга озодликдан маҳрум қилган.
Маълум қилинишича, агар ушбу ҳукм апелляция инстанциясида ҳам ўз кучида қолса, Юн Сок мансуб бўлган Халқ ҳокимияти партияси Миллий сайлов комиссиясидан сайлов кампанияси учун олинган 39,7 миллиард вон (тахминан 27,1 миллион АҚШ доллари) миқдоридаги маблағни қайтариши мумкин.
Собиқ президент айни пайтда 2025 йилда давлат тўнтаришига уриниш билан боғлиқ иш бўйича тайинланган умрбод қамоқ жазосини ўтамоқда. Унга нисбатан жами камида саккизта жиноят иши қўзғатилган.
Шунингдек, июль ойи ўрталарида Юн Сок Ёл сайловларни молиялаштириш тўғрисидаги қонунчиликни бузганлик бўйича ҳам қўшимча икки йиллик қамоқ жазосига ҳукм қилинган эди. Унинг рафиқаси, собиқ биринчи хоним Ким Кон Хи эса порахўрлик ва коррупция билан боғлиқ бир нечта айбловлар юзасидан судланмоқда.
