Жарима балларини пул эвазига ўчиришнинг имкони йўқ — ИИВ
ИИВ Йўл ҳаракати хавфсизлиги хизмати ижтимоий тармоқларда ҳайдовчиларнинг жарима балларини ўчириб беришни ваъда қилаётган фирибгарлардан огоҳ бўлишга чақирди.
Ижтимоий тармоқларда маълум миқдордаги пул эвазига ҳайдовчиларнинг жарима балларини базадан ўчириб ташлашни ваъда қилаётган фирибгарлар пайдо бўлди. Бу ҳақда ИИВ Жамоат хавфсизлиги департаменти Йўл ҳаракати хавфсизлиги хизмати матбуот котиби Зойир Йўлдошев маълум қилди.
Унинг таъкидлашича, жарима балларини пул эвазига ўчиришнинг техник имконияти мавжуд эмас.
“Бу фирибгарликдан бошқа нарса эмас. Жарима балларини ўчиришнинг техник имкониятлари мавжуд эмас. Бу онлайн тарзда ҳисобланадиган, тўлиқ ҳимояланган тизим. Шу боис фуқароларимиз бундай фирибгарларнинг ёлғон ваъдаларига ишониб қолмасликлари керак. Агар шундай ҳолатга дуч келишса, зудлик билан ички ишлар органларига мурожаат қилишларини сўраймиз”, — деди Зойир Йўлдошев.
Маълум қилинишича, мутахассислар Инстаграм орқали реклама қилинган хизматга оид Тelegram-канални ўрганиш жараёнида унда хизматдан фойдаланган мижозлар мавжуддек таассурот уйғотиш мақсадида сохта ёзишмалар жойлаштирилганини аниқлаган.
Эслатиб ўтамиз, 2026 йил 1 апрелдан бошлаб автоматик фото ва видео қайд этиш воситалари орқали аниқланадиган айрим йўл ҳаракати қоидабузарликлари учун жарима билан бир қаторда жарима баллари ҳам ҳисобланмоқда. Булар қарама-қарши ҳаракатланиш бўлагига чиқиш, тўхташ ва тўхтаб туриш қоидаларини бузиш, светофорнинг тақиқловчи ишорасига бўйсунмаслик ҳамда белгиланган тезликни ошириш ҳолатларидир.
Ҳозирга қадар 700 нафардан ортиқ ҳайдовчи 12 баллдан ортиқ жарима баллари тўплагани сабабли уларни транспорт воситасини бошқариш ҳуқуқидан маҳрум этиш бўйича қонунчиликда белгиланган чоралар кўрилмоқда.
