АҚШ ва Саудия Арабистони Ироқдаги объектга зарба берди
Вашингтон операция АҚШ ва Саудия Арабистони манфаатларига таҳдид солаётган нишонларга қарши ўтказилганини, воқеалар Эрон ракеталари билан боғлиқ эмаслигини билдирди.
АҚШ ва Саудия Арабистони Ироқнинг Ниневия вилоятида Эрон томонидан қўллаб-қувватланаётган қуролли гуруҳлар позицияларига нишонли ҳаво зарбалари берганини маълум қилди.
АҚШ Марказий қўмондонлиги (CENTCOM) маълумотига кўра, операция АҚШ ҳарбийлари ҳамда Саудия Арабистонининг энергетика инфратузилмасига таҳдид солаётган нишонларга қарши амалга оширилган. Вашингтон ушбу амалиёт Эрон томонидан Яқин Шарқдаги АҚШ объектларига учирилган баллистик ракеталарни тутиб қолиш билан боғлиқ эмаслигини таъкидлаган.
АҚШ ҳарбийлари баёнотида зарбалар Ислом инқилоби қўриқчилари корпуси (IRGC) томонидан қўллаб-қувватланаётган қуролли гуруҳларга қаратилгани қайд этилган. Шунингдек, қўмондонлик минтақадаги вазият юзасидан юқори жанговар шайлик сақланаётганини маълум қилган.
Вашингтон Теҳронни АҚШ ҳарбийлари ёки Саудия Арабистонининг энергетика инфратузилмасига қарши янги ҳужумлар амалга оширилган тақдирда қўшимча чоралар кўрилиши мумкинлигидан огоҳлантирган.
Саудия Арабистони Мудофаа вазирлиги ҳам операцияни тасдиқлаб, мамлакат кескинликни кучайтириш ниятида эмаслигини, бироқ ҳар қандай тажовузга қатъий жавоб қайтаришини билдирган.
Айни пайтда Ироқ ҳукумати мамлакат ҳудудидан қўшни ёки ҳамкор давлатларга қарши ҳужумлар учун фойдаланилишига йўл қўймаслигини маълум қилган. Ироқдаги Эрон тарафдори қуролли гуруҳлар эса мазкур ҳужумларга алоқадорлигини рад этиб, Саудия Арабистони томонидан илгари сурилган даъволарни асоссиз деб атади.
