Бухоро ва Қашқадарёда ер участкаларини расмийлаштириш эвазига пора олган мансабдорлар ушланди
Ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Давлат хавфсизлик хизмати маълум қилишича, Бухоро вилоятида Давлат кадастрлари палатаси бошқармаси бўлим бошлиғи маҳаллий фуқаронинг 2015 йилда Ромитан тумани ҳокимлиги захирасидаги 65 квадрат метр ер майдонида ўзбошимчалик билан қурилган савдо ва хизмат кўрсатиш биноси ҳамда унга туташ 35 квадрат метр бўш ер участкасини унинг номига расмийлаштириб беришни ваъда қилган.
Қайд этилишича, мансабдор шахс ушбу хизмат эвазига 2,5 минг АҚШ доллари олган вақтида Давлат хавфсизлик хизмати, Бош прокуратура ҳузуридаги Департамент ҳамда ички ишлар органлари ходимлари томонидан ашёвий далиллар билан ушланган.
Шунингдек, Қашқадарё вилоятида Инвестициялар, саноат ва савдо бошқармасининг Кўкдала тумани бўлими бош мутахассиси 2019 йилда Чироқчи тумани ҳокими қарори билан ажратилган 1 сотих ер майдони бўйича кадастр ҳужжатларини тайёрлаб, давлат рўйхатидан ўтказиб беришни ваъда қилган.
У мазкур хизмат учун 1 минг АҚШ доллари талаб қилиб, пулни олаётган вақтида Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан қўлга олинган.
Мазкур ҳолатлар юзасидан гумонланувчиларга нисбатан жиноят ишлари қўзғатилиб, тергов ҳаракатлари олиб борилмоқда.
