Наманганда банкдан қарздорлик сабаб юк машиналари хатланди
Маълум бўлишича, МЧЖнинг банкдан 5 млрд қарздорлиги бўлган.
Наманган туманлараро иқтисодий судининг ижро варақаси асосида қарздор МЧЖ ҳисобидан ундирувчи “Туронбанк” АТБ фойдасига жами 5 890 729 800 сўм қарздорликни солидар тартибда ундириш белгиланган. Мазкур қарор Бюронинг Наманган вилоят бошқармаси иш юритувига келиб тушган.
Суд ҳужжатига мувофиқ, ундирув юк автомашиналарга қаратилган.Ижро ҳаракатлари давомида автомашиналар Тошкент вилоятининг Ангрен шаҳри ҳудудида ҳаракатланаётгани аниқланди.
Шундан сўнг давлат ижрочилари томонидан мазкур транспорт воситалари қарздорлик ҳисобига хатланиб, белгиланган тартибда кўздан кечириш ишлари амалга оширилди.
Айни вақтда автомашиналар келгуси ижро ҳаракатларини таъминлаш, шу жумладан қонунчиликда белгиланган тартибда баҳолаш ва реализация қилиш жараёнларини ташкил этиш мақсадида Наманган вилоятига олиб келинди.
Мажбурий ижро бюроси томонидан суд ҳужжатлари ижросини таъминлаш борасида қонунчилик талаблари асосида тегишли ижро ҳаракатлари изчил давом эттирилмоқда.
