Покистонда кучли ёмғирлар оқибатида 100 дан ортиқ киши ҳалок бўлди
Муссон ёмғирлари юзлаб биноларга зарар етказиб, 200 дан ортиқ иншоотнинг бутунлай вайрон бўлишига сабаб бўлди.
Покистонда 26 июндан буён давом этаётган кучли муссон ёмғирлари ва улар келтириб чиқарган табиий офатлар оқибатида камида 109 киши ҳалок бўлди, яна 362 киши жароҳат олди.
Бу ҳақда Ислом Республикаси Табиий офатларни бошқариш миллий бошқармаси маълум қилди.
Маълумотларга кўра, энг кўп талафот мамлакатнинг шимоли-ғарбидаги Хайбер Пахтунхва вилоятида кузатилган бўлиб, у ерда 55 киши ҳалок бўлган. Панжоб вилоятида эса 36 нафар фуқаро табиий офатлар қурбонига айланган.
Кучли ёғингарчилик ва тошқинлар оқибатида мамлакат бўйлаб 800 га яқин бино зарар кўрган, шундан 200 дан ортиғи бутунлай вайрон бўлган.
Расмий маълумотларга кўра, июнь ойи охиридан буён 148 та қутқарув амалиёти ўтказилиб, қарийб 4 минг киши хавфсиз ҳудудларга эвакуация қилинган.
Покистонда муссон мавсуми одатда июнь–сентябрь ойларига тўғри келади. Ушбу ёғингарчиликлар қишлоқ хўжалиги учун муҳим аҳамиятга эга бўлсада, кўпинча кучли тошқинлар, кўчкилар ва бошқа табиий офатларга сабаб бўлади.
