Тошкентда 3,5 млн долларлик кредит эвазига 420 минг доллар талаб қилган шахслар ушланди
Банк ходими ва унинг шериги кредит ажратиш эвазига ноқонуний ҳақ олаётган вақтда тезкор тадбирда қўлга олинди.
Тошкент шаҳрида 3,5 млн АҚШ доллари миқдоридаги имтиёзли кредитни расмийлаштириб бериш эвазига 420 минг доллар талаб қилган шахслар қўлга олинди. Бу ҳақда ДХХ хабар берди.
Аниқланишича, хусусий акциядорлик тижорат банкларидан бирининг Олмазор филиали банк хизматлари маркази юристи ҳамда Тошкент вилоятининг Янгийўл туманида яшовчи, 1979 йилда туғилган, муқаддам судланган шахс ўзаро тил бириктириб, тадбиркорлик фаолиятини йўлга қўймоқчи бўлган фуқаронинг ишончига кирган.
Улар фуқаро номига 3,5 млн АҚШ доллари миқдорида имтиёзли кредит ажратиб беришни ваъда қилиб, бунинг эвазига кредит суммасининг 12 фоизи — 420 минг АҚШ долларини талаб қилган.
Тезкор тадбир давомида гумонланувчилар олдиндан 50 минг АҚШ доллари олаётган вақтида ашёвий далиллар билан қўлга олинган.
Мазкур ҳолат юзасидан гумонланувчиларга нисбатан жиноят иши қўзғатилиб, уларга қамоқ эҳтиёт чораси қўлланилган. Ҳозирда тергов ҳаракатлари давом эттирилмоқда.
