Тошкентда “Яшил тўлқин” тизимининг илк йўналиши ишга туширилди
Тизим эрталаб шаҳар маркази, кечқурун эса қарама-қарши йўналишда ишлайди ва светофорларнинг синхрон ҳаракатини таъминлайди.
Йўл ҳаракатини ташкил этиш маркази мутахассислари томонидан Буюк ипак йўли кўчасининг “Тўра Бува” масжидидан Салом кўчасигача бўлган қисмидаги 13 та чорраҳада светофорлар фаолияти ўзаро синхронлаштирилди.
Мазкур тизимга кўра, эрталабки тирбандлик вақтида “Яшил тўлқин” шаҳар маркази томон, кечки пайтда эса қарама-қарши йўналишда ишлайди.
Светофорларнинг синхронлаштирилиши натижасида ушбу йўналишдаги ҳаракатланиш вақти сезиларли даражада қисқарди. Хусусан, “Тўра Бува” масжидидан Салом кўчасигача бўлган йўналишда ўртача ҳаракатланиш вақти 8,5 дақиқадан 6 дақиқагача, яъни 29 фоизга камайди.
Шунингдек, Салом кўчасидан “Тўра Бува” масжидигача бўлган қарама-қарши йўналишда ўртача ҳаракатланиш вақти 10 дақиқадан 8 дақиқагача, яъни 20 фоизга қисқарди.
Мутахассисларнинг таъкидлашича, тизимдан максимал самарага эришиш учун ҳайдовчилар Йўл ҳаракати қоидалари ҳамда белгиланган тезлик меъёрларига қатъий риоя қилиши лозим. Мазкур йўналишда 40–60 км/соат тезликда ҳаракатланганда чорраҳаларнинг аксариятидан светофорнинг қизил чироғида тўхтамасдан ўтиш имконияти яратилади.
Айни пайтда Йўл ҳаракатини ташкил этиш маркази мутахассислари ақлли светофорлар ўрнатилган Тошкент шаҳрининг бошқа кўчаларида ҳам “Яшил тўлқин” тизимини жорий этиш бўйича ҳисоб-китоб ва лойиҳалаш ишларини давом эттирмоқда.
