Тожикистон ҳижоб ва узун соқол тақиқлангани ҳақидаги хабарларга муносабат билдирди
Айрим ОАВларда тарқалган ҳижоб ва соқол бўйича маълумотлар ҳақиқатга мос келмайди.
Тожикистон расмийлари мамлакатда ҳижоб ва узун соқолни қонун билан тақиқлаш жорий этилгани ҳақидаги хабарларни рад этди.
Бу ҳақда Asia-Plus нашри Тожикистон Дин ишлари, миллий анъаналар, байрамлар ва маросимларни тартибга солиш қўмитаси маълумотига таяниб хабар берди.
Қўмита баёнотида айрим оммавий ахборот воситаларида тарқалган, гўёки мамлакатда ҳижоб кийган аёллар ва узун соқол қўйган эркакларга нисбатан жарималар жорий этилгани ҳақидаги маълумотлар ҳақиқатга тўғри келмаслиги таъкидланган.
Шунингдек, ижтимоий тармоқлар ва айрим нашрларда жарима қўлланган шахслар кейинчалик ташқи кўринишидаги ўзгаришларни тасдиқловчи суратларни мунтазам равишда давлат органларига тақдим этиши шартлиги ҳақидаги хабарлар ҳам асоссиз экани қайд этилган.
Тожикистон Дин ишлари қўмитаси мазкур маълумотларни рад этиб, мамлакатда бундай мазмундаги янги қонун қабул қилинмаганини маълум қилган.
