Трамп Нетаняхуни одатдагидан совуқроқ кутиб олди
АҚШ президенти ва Исроил бош вазири ўртасидаги таранглик бир неча ҳафтадан буён давом этмоқда.
АҚШ президенти Доналд Трамп Исроил бош вазири Бенямин Нетаняхуни Оқ уйда аввалги учрашувларга нисбатан камроқ илиқ кутиб олди. Бу ҳақда The Wall Street Journal (WSJ) манбаларга таяниб хабар берди.
Нашр маълумотларига кўра, икки етакчи ўртасидаги муносабатларда сўнгги ҳафталарда муайян таранглик кузатилган. Ҳатто Трампнинг Нетаняху билан учрашув ўтказишга розилик бериши ҳам маълум вақтгача ноаниқ бўлиб қолган.
WSJ манбаларининг билдиришича, учрашув арафасида АҚШ маъмурияти Исроил бош вазиридан Ливандаги тинчлик музокараларини илгари суришга жиддий ёндашаётганини амалий чоралар орқали намойиш этишни талаб қилган.
Шунингдек, газета Нетаняхунинг бу галги ташрифи аввалгиларга қараганда сиёсий таъсири ва мавқеи жиҳатидан анча чекланган шароитда ўтганини қайд этган. Нашрга кўра, бунга Эрон билан боғлиқ ҳарбий вазият ва унинг давомийлиги сабаб бўлган.
Бироқ учрашув якунида Доналд Трамп Tramp Truth ижтимоий тармоғидаги саҳифасида Нетаняху билан "жуда яхши учрашув" ўтказганини ва томонлар кўплаб муҳим масалаларни муҳокама қилганини маълум қилган.
Ўз навбатида, Бенямин Нетаняху Fox News телеканалига берган интервьюсида мазкур музокараларни Трамп билан ўтказган "энг яхши учрашувлардан бири" деб баҳолаган.
