Ўзбекистонликлар Дубайга ишга таклиф қилинмоқда

 
Ўзбекистон фуқаролари БААнинг Дубай халқаро аэропортида бизнес ва биринчи тоифа йўловчилари учун мўлжалланган махсус кутиш залларида хизмат кўрсатиш соҳасида ишлашга таклиф қилинмоқда. Ваканциялар сони 80 та бўлиб, номзодлар билан 2 йиллик меҳнат шартномаси тузилади. Бу ҳақда Миграция агентлиги хабар берди.

 
Иш кунига 8 соатни ташкил этади. Ойлик иш ҳақи 8 226 БАА дирҳам (тахминан 2 250 АҚШ доллари) этиб белгиланган. Мазкур даромаддан солиқ ушлаб қолинмайди.

 
Номзодлардан 20–30 ёш оралиғида бўлиши, меҳмонхона ва ресторан хизмати йўналиши бўйича мутахассисликка эга бўлиши, овқат ва ичимликлар хизмати соҳасида камида 1 йиллик иш тажрибаси ҳамда инглиз тилини камида B2 даражада билиши талаб этилади. IELTS, TOEFL ёки бошқа халқаро тил сертификатига эга номзодларга устунлик берилади.

 
Иш берувчи ишчи визаси, Ўзбекистон–БАА авиачиптаси, аэропортдан иш жойигача трансфер, иш рухсатномаси, тиббий суғурта, турар жой, овқатланиш ва иш жойига транспорт харажатларини тўлиқ қоплайди.

 
Номзодлар аризаларни 13 августга қадар xorijdaish.uz сайти орқали топшириши мумкин. Ҳужжатлар 3–7 кун ичида кўриб чиқилади. Талабларга мос келган номзодлар 20–25 август кунлари бўлиб ўтадиган онлайн суҳбат босқичига таклиф этилади.