Андижондаги боғчада болаларни ҳақоратлаган тарбиячи ишдан бўшатилди
Ҳолат Болалар омбудсмани томонидан назоратга олинди.
Ижтимоий тармоқларда Андижон вилоятидаги нодавлат мактабгача таълим муассасасида тарбиячининг болаларга нисбатан номақбул муносабатда бўлгани акс этган видеолар тарқалди. Ҳолат Болалар омбудсмани томонидан назоратга олинди.
Аниқланишича, Андижон туманида жойлашган нодавлат мактабгача таълим муассасасида фаолият юритган тарбиячи Й. М. тарбияланувчиларга нисбатан қўпол муомалада бўлган ҳамда уларни турли ҳақоратли ва ахлоққа зид сўзлар билан таҳқирлаган.
Мазкур ҳолат юзасидан хизмат ўрганиши ўтказилиб, 2026 йил 28 июль куни тарбиячининг меҳнат мажбуриятларига зид хатти-ҳаракатлари сабаб у билан тузилган меҳнат шартномаси бекор қилинган.
Ҳозирда ҳолат юзасидан ҳуқуқий баҳо бериш мақсадида Андижон тумани Ички ишлар бўлими томонидан терговга қадар текширув олиб борилмоқда.
Болалар омбудсмани эса боланинг ҳуқуқлари тўлиқ тикланиши ва ҳолатга қонуний баҳо берилиши юзасидан назоратни давом эттиришини маълум қилди.
