Apple Pay ва Google Pay яқин ойларда Ўзбекистонда ишга тушиши мумкин

 

Apple Pay ва Google Pay тўлов хизматлари яқин бир неча ой ичида Ўзбекистонда ишга туширилиши мумкин. Бу ҳақда Марказий банкнинг Тўлов тизимларини ривожлантириш департаменти раҳбари Жамшид Усмонов маълум қилди.

 

Унинг сўзларига кўра, шахсга доир маълумотлар тўғрисидаги қонунчиликка киритилган ўзгартиришлардан сўнг Марказий банк тижорат банклари, Humo ва Uzcard миллий тўлов тизимлари билан биргаликда Apple ҳамда Google компаниялари билан музокараларни бошлаган. Ҳозирда хизматларни техник жиҳатдан интеграция қилиш ишлари давом этмоқда.

 

Жамшид Усмоновнинг таъкидлашича, тижорат банклари интеграция жараёнларини фаол олиб бормоқда. Хусусан, карталарни токенизация қилиш билан боғлиқ техник масалалар устида иш олиб борилмоқда.

 

Марказий банк вакили мазкур лойиҳа фақат халқаро Visa ва Mastercard карталарини қўллаб-қувватлаш билан чекланиб қолмаслигини қайд этди. Унинг сўзларига кўра, Humo ва Uzcard миллий тўлов тизимлари карталарини ҳам Apple Pay ва Google Pay хизматларига улаш имкониятини яратиш устида иш олиб борилмоқда.

 

Усмоновнинг билдиришича, лойиҳа юзасидан яқин бир неча ой ичида ижобий янгиликлар кутилмоқда. Шунингдек, бир ёки бир нечта тижорат банклари ушбу хизматларни Ўзбекистонда биринчи бўлиб ишга тушириши мумкин.

 

Маълум қилинишича, Марказий банк ва Apple ҳамда Google вакиллари ўртасидаги музокаралар жорий йилнинг апрель–май ойларида бўлиб ўтган ва техник ҳамкорлик юзасидан ишлар изчил давом эттирилмоқда.