Арманистон ҳукумати истеъфога чиқади — Пашинян
2 августдан янги парламент фаолият бошлайди, шундан сўнг Арманистонда янги ҳукумат шакллантирилади.
Арманистон Бош вазири Никол Пашинян мамлакат ҳукумати янги чақириқ Миллий Ассамблея фаолияти бошланиши муносабати билан конституцияга мувофиқ истеъфога чиқишини маълум қилди.
Пашиняннинг айтишича, ҳукуматнинг навбатдаги йиғилиши амалдаги Вазирлар Маҳкамаси учун сўнгги йиғилиш бўлди.
“Бу бизнинг охирги ҳукумат йиғилишимиз. Тўққизинчи чақириқ Миллий Ассамблея иш бошлаши муносабати билан Конституцияга мувофиқ истеъфога чиқамиз”, — деган у.
Маълум қилинишича, ҳукумат истеъфосидан сўнг Арманистон президенти парламентдаги кўпчилик томонидан кўрсатилган номзодни бош вазир лавозимига тайинлайди. Айни пайтда парламентдаги кўпчиликни “Фуқаролик шартномаси” партияси ташкил этади.
Янги чақириқ Миллий Ассамблея 2 август куни ўз фаолиятини бошлайди. Шундан сўнг янги ҳукумат таркибини шакллантириш жараёни бошланади.
Эслатиб ўтамиз, июнь ойида Арманистонда парламент сайловлари натижаларига қарши мухолифат намойишлари бўлиб ўтган эди. Конституциявий суд сайлов натижаларини ўз кучида қолдирганидан сўнг ҳам мухолифат сиёсий курашни давом эттиришини билдирган.
Сўнгги парламент сайловлари якунларига кўра, “Фуқаролик шартномаси” партияси 49,7 фоиз овоз билан биринчи ўринни эгаллаб, парламентдаги кўпчиликни қўлга киритган.
