“Чорсу”, “Ўрикзор”, “Қўйлиқ” ва яна ўнлаб бозорлар сотувга қўйилади

 

Тошкент шаҳридаги 35 та бозор ва савдо комплекси ҳамда уларнинг шохобчалари оммавий савдоларга чиқарилади. Бу Президентнинг “Тошкент шаҳрини 2026–2027 йилларда ижтимоий-иқтисодий ривожлантириш бўйича қўшимча чора-тадбирлар тўғрисида”ги қарорида белгиланди.

 

Ҳужжатга кўра, бозор ва савдо комплексларини оммавий савдоларга чиқариш жараёнида буюртмачи сифатида “Тошкент инвест компанияси” АЖ иштирок этади. Компания ҳар бир объект бўйича алоҳида бизнес лойиҳасини ишлаб чиқади ва айнан шу лойиҳа асосида инвесторларга таклиф этилади.

 

Шунингдек, бозорларни сотишдан тушадиган маблағнинг 1 фоизи, шунингдек савдони ташкил этиш билан боғлиқ харажатлар “Тошкент инвест компанияси” АЖга йўналтирилади.

 

Қарорга мувофиқ, савдога чиқариладиган бозор ва савдо комплекслари ҳудудида замонавий экобозорлар, савдо ва хизмат кўрсатиш марказлари, кўнгилочар мажмуалар ҳамда кўп қаватли автотураргоҳлар ташкил этилиши мажбурий шарт сифатида белгиланмоқда.

 

Оммавий савдога чиқариладиган объектлар рўйхатидан қуйидагилар ўрин олган:

• “Наврўз деҳқон бозори” АЖ;

• “Чилонзор буюм савдо комплекси” АЖ;

• “Бек тўпи савдо комплекси” МЧЖ;

• “Сергели деҳқон бозори” АЖ;

• “Истеъмолда бўлган транспорт воситалари ва эҳтиёт қисмлари Сергели бозори” МЧЖ;

• “Паркент универсал савдо комплекси” АЖ;

• “Янгиобод ихтисослаштирилган бозори” МЧЖ;

• “Авиасозлар деҳқон бозори” АЖ;

• “Қора-қамиш деҳқон бозори” МЧЖ;

• “Фарҳод деҳқон бозори” АЖ;

• “Ўрикзор савдо комплекси” МЧЖ;

• “Қўйлиқ деҳқон бозори” АЖ;

 

Бундан ташқари, «Наврўз», «Юнусобод», «Сергели» ва «Қора-қамиш» деҳқон бозорларига қарашли 20 дан ортиқ шохобча, “Бек тўпи” автотураргоҳи ҳамда “Бешқўрғон савдо” МЧЖ ҳам электрон савдоларга чиқарилади.

 

Қарорда яна бир муҳим норма белгиланган. Унга кўра, Тошкент шаҳридаги бошқа деҳқон бозорлари, ихтисослаштирилган ва буюм бозорлари шохобчалари, шунингдек уларга тегишли бўш турган ер майдонлари ҳам тасдиқланадиган мастер-режалар ва белгиланган шартлар асосида баҳоланган қийматда электрон онлайн аукцион савдоларига чиқарилади.