Давлат харидлари тизимида 7,8 триллион сўм иқтисод қилинди

Ўзбекистон Президентининг 2026 йил 4 февралдаги ПФ–17-сон фармони асосида ташкил этилган Саноат кооперацияси ва давлат харидлари агентлиги жорий йилнинг биринчи ярмида амалга оширилган ишлар юзасидан ҳисобот берди. Мазкур фармон маҳаллий ишлаб чиқаришни қўллаб-қувватлаш, саноат кооперациясини ривожлантириш ҳамда давлат харидларини иқтисодиётнинг муҳим драйверига айлантиришни назарда тутади.

Маълум қилинишича, ҳисобот даврида маҳаллийлаштириш дастури доирасида 1 746 та лойиҳа амалга оширилди. Натижада 83 турдаги янги маҳсулот ишлаб чиқариш йўлга қўйилди ва импорт ўрнини босиш ҳажми 3,8 миллиард долларга етди. Жумладан, «Навоиязот» АЖда натрий цианид, "Ўз-Тонг Ҳонг Компани" АЖда BYD автомобиллари учун ўриндиқлар, «O‘z-Hanwoo» МЧЖда KIA Sonet автомобиллари салон қисмлари ҳамда "Vodiy Circuits" МЧЖда электрон платалар ишлаб чиқариш ўзлаштирилди.

Шунингдек, тадбиркорлар билан тўғридан тўғри мулоқотларни кучайтириш мақсадида республиканинг 208 та туман ва шаҳрида очиқ учрашувлар ташкил этилди. Уларда 2 700 нафардан ортиқ тадбиркор иштирок этиб, ишлаб чиқариш, маҳаллийлаштириш, давлат харидлари ва саноат кооперациясига оид масалаларни кўтарди. Жами 447 та мурожаат ва таклиф қайд этилган бўлиб, уларнинг 155 таси жойида ҳал этилди, қолганлари бўйича эса тегишли чора-тадбирлар белгиланди.

Бундан ташқари, Оҳангарон ва Самарқанд вилоятининг Жомбой туманида ўтказилган "Миллий саноат занжири" кўргазмалари саноат корхоналари ва йирик буюртмачиларни бир майдонда жамлади. Ушбу тадбирлар якунида 3,8 триллион сўмлик шартнома ва келишувларга эришилди. Шу билан бирга, тадбиркорларга 1,5 миллиард долларлик маҳаллийлаштириш салоҳиятига эга 856 турдаги янги маҳсулот тақдим этилди.

Шунингдек, давлат харидлари соҳасида ҳам ижобий кўрсаткичлар қайд этилди. Хусусан, йилнинг биринчи ярмида давлат харидлари ҳажми 188,4 триллион сўмни ташкил этди. Шундан 112,9 триллион сўми рақобатли харидлар ҳиссасига тўғри келган бўлиб, натижада 7,8 триллион сўм бюджет маблағи иқтисод қилинди. Харид жараёнларини рақамлаштириш доирасида сунъий интеллект асосидаги модерация тизимлари жорий этилди ҳамда тадбиркорлар учун 100 миллион сўмгача фоизсиз кредит олиш имконияти яратилди.

Агентликнинг қайд этишича, жорий йилнинг иккинчи ярмида ҳам саноат кооперациясини кенгайтириш, давлат харидларида маҳаллий маҳсулотлар улушини ошириш, сунъий интеллект асосидаги янги тизимларни тўлиқ ишга тушириш, шунингдек, "Маке ин Узбекистан" кўргазмаси ҳамда PRIMO–19 халқаро форумига тайёргарлик кўриш устувор йўналишлардан бири бўлади.