МИБ ярим йилда 2 трлн сўм алимент пулларини ундирди
Ушбу кўрсаткич ўтган йилнинг мос даврига нисбатан 62 фоизга ошган.
Мажбурий ижро бюроси органлари томонидан судлар ва бошқа органлар ҳужжатларининг ижросини таъминлаш, фуқаролар, жамият ҳамда тадбиркорларнинг ҳуқуқларини ҳимоя қилиш, қолаверса аҳолининг одил судловга бўлган ишончини мустаҳкамлаш ва фаолият самарадорлигини ошириш ва соҳани янада рақамлаштириш борасида изчил ислоҳотлар амалга оширилмоқда.
Хусусан, Бюро фаолиятига оид 6 та норматив-ҳуқуқий ҳужжат, шундан 3 та қонун ва 3 та Давлатимиз раҳбарининг тегишли Фармонлари қабул қилинди.
Шунингдек, ижро ҳужжатларини ижро этиш самарадорлигини ошириш мақсадида 1 та қонун, 2 та Вазирлар Маҳкамаси қарори лойиҳаси ишлаб чиқилиб, тегишли тартибда киритилиши таъминланди.
Кўрилган чора-тадбирлар натижасида, жорий йилнинг ўтган даврида жами 36,3 трлн. сўмлик ундирувлар амалга оширилиб, ушбу кўрсаткич ўтган йилнинг мос даврига нисбатан 10,7 трлн. сўмга ошганлиги кўрсатмоқда.
Биргина, давлат фойдасига 25,6 трлн сўм, тадбиркорлик ва бошқа субъектлар фойдасига 9,7 трлн. сўм ҳамда фуқароларимиз манфаатлари учун 1 трлн. сўмдан зиёд маблағлар ундирилди.
Давлатнинг мажбурлов механизмидан фойдаланмаган ҳолда ахборот - коммуникация технологиялари орқали 1,3 млн.та ижро ҳужжатлари соддалаштирилган тартибда ижро этилди.
Шунингдек, ижтимоий аҳамиятга эга бўлган ижро ҳужжатлари бўйича ҳам тизимли ишлар амалга оширилмоқда.
Масалан, Давлатимиз раҳбарининг тегишли Фармони билан эҳтиёжманд фуқароларни қўллаб-қувватлар учун жорий этилган “Дафатлар” ҳисобига 165 млрд. сўм маблағлар йўналтирилди.
Вояга етмаган шахсларнинг моддий таъминоти учун жами 2 трлн. сўм алимент пуллари ундирилиб, бу йўналишдаги ундирувлар 782 млрд. сўмга ёки 62 фоизга ошди.
“Алимент тўловлари” жамғармаси ҳисобидан вояга етмаган фарзандини моддий таъминлаш мақсадида, 346 нафар ундирувчиларга 18,6 млрд. сўм маблағ тўлаб берилди.
Шунингдек, алиментга оид ижро ишлари бўйича манзилли ишлар натижасида, алимент тўлаш истаги бўла туриб, лекин иш бандлиги бўлмаган 13.400 нафар фуқаролар ишга жойлаштирилди, олиб борилган тушунтириш ишлари натижасида, 7.100 дан ортиқ оилалар яраштирилди.
Муқаддам, қонунга хилоф равишда ишдан бўшатилган 344 нафар шахслар ишга тикланиб, уларга тўланмай қолган 15,2 млрд. сўмлик иш ҳақлари ундириб берилди.
“Мажбуриятлар реестри”га киритилган қарздорлар томонидан ўтган 6 ой давомида 404 млрд. сўм маблағлар тўланди.
Таъкидлаш жоизки, жорий йилнинг ўтган даврида Виртуал ва Халқ қабулхоналари орқали Бюро фаолиятига оид 60 мингта мурожаат келиб тушди ва шундан 52 мингтаси ҳал қилинди, шундан 29 мингтаси (58 %) қаноатлантирилди, 21 мингтасига (40 %) эса, ҳуқуқий тушунтириш берилди.
Кўрилган чора-тадбирлар натижасида, алимент ундирувига оид мурожаатлар 909 тага, қарз ва зарар ундириш юзасидан йўлланган мурожаатлар 2 382 тага камайтирилди.
Бюро органлари тизимига замонавий ахборот технологияларини кенг жорий этиш орқали соҳани янада рақамлаштиришга алоҳида эътибор қаратилмоқда.
Натижада, 36 та ижро ҳаракатидан 22 таси инсон омилисиз ахборот тизимлари орқали амалга оширилмоқда.
Жумладан, ижро иши доирасида қабул қилинган 53 млн.та қарорлардан 38,6 млн.таси ёки 73 фоизи инсон аралашувисиз автоматик тарзда қабул қилинди.
Ижро иши қўзғатилгани ҳақида қарздор шахсларга 50 млн.та “SMS-хабарнома”лар юборилди ва ижро иши бўйича 1,2 млн.та автомат қўнғироқлар амалга оширилди.
Тақиқлар автомат ечилиши натижасида 10 трлн. сўм қарздорлик электрон тўлов тизимлари орқали ундирилиб, қўлланилган 7,7 млн.та чекловлар инсон омилисиз бекор қилинди.
Соҳани рақамлаштириш натижасида, 2021 йилда 1 нафар давлат ижрочиси 1 ойда ўртача 113 та ҳужжатни тамомлаган бўлса, бугунги кунда ушбу кўрсаткич 338 тани ташкил қилиб, иш самарадорлиги 3 баробарга оширилди.
Фаолиятига ошкоралик бериш борасида, жамоатчилик ва аҳоли ўртасида 23.772 та ҳуқуқий тарғибот тадбири ўтказилиб, 11 мингдан ортиқ тадбирлар оммавий ахборот воситалари ёрдамида амалага оширилди.
Шу ўринда, фуқароларимиздан қарздорлик ва тўловларни амалга оширишда, электрон тўлов тизимларидан фойдаланишини тавсия этиб қоламиз.
Бу эса, бу сизнинг вақтингизни тежайди ва хавфларни камайтиради.
Бироқ, айрим фуқароларимиз қарздорликни нақд пул кўринишида ҳам амалга ошириш истагини ҳам билдиришлари мумкин.
Бундай ҳолларда, Бюро давлат ижрочилари ўзига бириктирилган планшет воситаси орқали нақд пул маблағларини электрон тарзда расмийлаштириб, қарздорга хатлов далолатномаси нусхасини тақдим этиши лозим ва бу ҳақида фуқароларимизга тўланган маблағ ва қарздорликнинг бартараф этилганлиги, ҳатто мавжуд тақиқларнинг бекор қилинганлиги ҳақидаги жараёнлар “SMS хабарнома” орқали маълум қилинади.
