Нукусда алиментдан қарздор “қочоқ ота” қўлга тушди
Қарздор кузатув пайти воқеа жойидан қочишга ҳаракат қилган, бироқ Ички ишлар ходимларининг ҳаракати билан ушланган.
Нукусда алимент тўлашдан бўйин товлаб, яшириниб юрган ота банк биноси ҳудудида қўлга тушди. Бу ҳақида МИБ ахборот хизмати Zamon.uz'га маълум қилди.
Қайд этилишича, Фуқаролик ишлари бўйича Нукус туманлараро суднинг ижро ҳужжатига асосан ундирувчи Ш.Г. фойдасига тарбиясидаги бир нафар фарзандининг таъминоти учун қарздор Ж.К. дан алимент ундириш белгиланган.
Қарздор томонидан алимент пуллари ҳар ой ўз вақтида тўлаб келинмаганлиги сабабли ижро ҳужжати ижросини таъминлаш мақсадида, қарздорнинг яшаш манзилига бир неча маротаба борилганида, қарздор ушбу манзилда йўқлиги аниқланган.
Шу сабабли унга нисбатан Мажбурий ижро бюроси Нукус шаҳар бўлими давлат ижрочиси томонидан қидирув эълон қилинган.
Мажбурий ижро бюроси Қорақалпоғистон Республикаси бошқармаси қидирув шўъбасида қарздор ҳар куни бир йўналишда Нукус шаҳри бўйлаб ҳаракатланиб юрганлиги аниқланиб, қарздорни ушлаш режаси тузилган.
Жорий йилнинг 29 июль куни ҳам қарздор шу йўналиш бўйлаб ҳаракатга чиққан ва у тезкор ходимлар томонидан кузатиб борилган. Қарздорнинг банк муассасасига бориши аниқ бўлгач, қўшимча режа ишланиб чиқилган.
Шундан сўнг қарздор фуқаро Нукус шаҳрида жойлашган “Саноатқурилишбанк”ига борганида Ички ишлар ходимлари томонидан унинг ҳужжатлари сўралади. Шунда қарздор воқеа жойидан қочишга ҳаракат қилган, бироқ Ички ишлар ходимларининг ҳаракати билан ушланган.
Ҳозирда қарздор томонидан алимент тўлаш мажбуриятини ўз вақтида бажармаганлиги сабабли, унинг жавобгарлик масаласи кўриб чиқилмоқда.
