Шерободда браконерлар қўриқхона ходимларига ўқ узди
Ҳуқуқбузарлар қўриқхона ходимларининг тўхташ талабига бўйсунмаган ва воқеа жойидан қочиб кетган.
Сурхондарё вилоятининг Шеробод туманида «Сурхон» давлат қўриқхонаси ҳудудида содир этилган ноқонуний ов ҳолати юзасидан уч нафар шахсга нисбатан жиноят иши қўзғатилди. Бу ҳақда Экология ва иқлим ўзгариши миллий қўмитаси хабар берди.
Маълум қилинишича, қўриқхона ходимлари хизмат кузатуви давомида «Шержон» бўлими ҳудудида ов қуроллари билан юрган уч нафар шахсни аниқлаган.
Ҳуқуқбузарларга бир неча бор тўхташ талаби қўйилган. Бироқ улар қонуний талабга бўйсунмай, қўриқхона ходимларига қарата ўқ узган ҳамда рюкзакларини воқеа жойида ташлаб, қочиб кетган.
Воқеа жойида қолдирилган рюкзаклар кўздан кечирилганда, уларнинг ичидан икки бош ёввойи ҳайвоннинг бўлакланган гўшти топилган.
Ўтказилган тезкор-қидирув ва суриштирув тадбирлари давомида гумонланувчиларнинг шахси аниқланиб, тўпланган материаллар Шеробод тумани Ички ишлар бўлимига тақдим этилган.
Мазкур ҳолат юзасидан Жиноят кодексининг 202-моддаси 3-қисми (ҳайвонот дунёсидан фойдаланиш қоидаларини бузиш) билан жиноят иши қўзғатилди.
Ҳозирда ҳолат бўйича дастлабки тергов ҳаракатлари олиб борилмоқда.
