Тошкентда ёлғиз кекса аёлнинг уйи ўзлаштирилдими?

 

Тошкент шаҳрида ёлғиз яшовчи кекса аёлнинг уй-жойи билан боғлиқ ҳолат юзасидан жиноят иши қўзғатилди. Бу ҳақда Бош прокуратура маълум қилди.

 

Қайд этилишича, ижтимоий тармоқларда Мирзо Улуғбек туманида яшовчи ёлғиз кекса аёл қаровсиз қолдирилгани акс этган видеолавҳа тарқалганидан сўнг мазкур ҳолат юзасидан туман прокуратураси томонидан терговга қадар текширув ўтказилган.

 

Текширув давомида 1940 йилда туғилган фуқаро Л. Журавлёва Мирзо Улуғбек туманидаги хонадонда ёлғиз яшаб келгани ҳамда соғлиғи билан боғлиқ бир қатор касалликлар сабабли диспансер ҳисобида тургани аниқланган.

 

Шунингдек, унга тегишли хонадон 2025 йил 25 сентябрь куни нотариал тартибда расмийлаштирилган олди-сотди шартномаси асосида бошқа шахс номига ўтказилгани маълум бўлган.

 

Прокуратура маълумотига кўра, уй-жой бегоналаштирилган вақтда фуқаронинг ўз ҳаракатларининг мазмунини англаш ҳамда уларни бошқариш қобилиятига эга бўлган-бўлмаганини, шунингдек, унинг фирибгарлик жинояти қурбони бўлган бўлиши мумкинлигини аниқлаш зарурати юзага келган.

 

Шу муносабат билан мазкур ҳолат юзасидан Жиноят кодексининг 168-моддаси 4-қисми «а» банди билан жиноят иши қўзғатилди.

 

Ҳозирда иш бўйича барча ҳолатларни ҳар томонлама, тўлиқ ва холисона ўрганишга қаратилган дастлабки тергов ҳаракатлари олиб борилмоқда.