15 та ҳудудда электр ва газ масалалари бўйича махсус штаблар ташкил этилди

 

Энергетика вазирлиги республиканинг 15 та ҳудудида электр энергияси ва табиий газ таъминоти билан боғлиқ муаммоларни тизимли бартараф этиш ҳамда истеъмолчиларга кўрсатилаётган хизматлар сифатини ошириш мақсадида махсус штаблар ташкил этди.

 

Вазирлик маълумотига кўра, мазкур штаблар жойлардаги электр ва газ таъминоти ҳолатини чуқур таҳлил қилиш, мавжуд камчиликларни аниқлаш, уларни тезкор бартараф этиш ҳамда аҳолидан келаётган мурожаатларни ўз вақтида ҳал этишга хизмат қилади.

 

Ҳар бир штабга энергетика тизимидаги йирик корхона ва ташкилотлар раҳбарлари штаб бошлиғи сифатида бириктирилган. Тегишли туман ҳокимлари эса штаб раҳбарининг ўринбосари этиб белгиланган.

 

Махсус штаблар қуйидаги ҳудудларда фаолият юритади:

• Андижон тумани – Энергетика вазири маслаҳатчиси Дадажон Исакулов;

• Давлатобод тумани – “Ўзбекистон миллий электр тармоқлари” АЖ раиси Абдумалик Назиров;

• Денов тумани – «Ўзенергоинспекция» бошлиғи ўринбосари Бехзод Собиров;

• Фарғона тумани – «Ҳудудгазтаъминот» АЖ раиси Маруфхон Ходжаев;

• Косон тумани – «Ўзенергоинспекция» бошлиғи ўринбосари Хуршиджон Эшқўзиев;

• Мирзо Улуғбек тумани – Энергетика вазирининг биринчи ўринбосари Умид Мамадаминов;

• Қўштепа тумани – «Ўзенергосотиш» АЖ раиси Жаҳонгир Обиджонов;

• Сирдарё тумани – “Иссиқлик электр станциялари” АЖ раиси Баҳодир Жўраев;

• Тўрткўл тумани – “Иссиқлик электр станциялари” АЖ раисининг биринчи ўринбосари Озод Ахунов;

• Урганч тумани – “Ҳудудий электр тармоқлари” АЖ раисининг биринчи ўринбосари Бобур Исломов;

• Ургут тумани – “Ҳудудий электр тармоқлари” АЖ раиси Сардор Исакулов;

• Хатирчи тумани – Энергетика вазири ўринбосари Умаржон Эгамбердиев;

• Янгийўл тумани – Энергетика вазири Шерзод Ходжаев;

• Ғиждувон тумани – «Ўзтрансгаз» АЖ раиси Аскар Исаков;

• Шароф Рашидов тумани – «Ўзенергоинспекция» бошлиғи Ахад Исоқжонов.

 

Энергетика вазирлиги ушбу ҳудудларда яшовчи фуқароларни электр ва газ таъминоти билан боғлиқ муаммо, мурожаат ёки таклифлари бўлса, туман ҳокимликлари ҳузурида ташкил этилган махсус штабларга мурожаат қилишга чақирди.

 

Қайд этилишича, айнан ушбу ҳудудлар электр энергияси ва табиий газ бўйича қарздорлик даражасининг юқорилиги, энергия йўқотишларининг кўплиги, тармоқларнинг эскиргани, шунингдек, аҳолидан келиб тушаётган мурожаатлар сонининг юқорилиги каби мезонлар асосида танлаб олинган.