95 нафар олимнинг 157,2 млрд сўмлик илмий грант лойиҳалари молиялаштирилди
Молиялаштирилган илмий лойиҳалар иқтисодиёт, саноат, соғлиқни сақлаш ва экология соҳаларини ривожлантиришга қаратилган.
Инновацион ривожланиш агентлигида Ўзбекистон мустақиллигининг 35 йиллиги муносабати билан давлат илмий дастурлари доирасида ўтказилган танловлар ғолибларини тақдирлаш маросими бўлиб ўтди. Унда умумий қиймати 157,2 миллиард сўмлик 95 та илмий лойиҳа муаллифларига грант сертификатлари топширилди.
Тадбирда Инновацион ривожланиш агентлиги директорининг вазифасини вақтинча бажарувчи А. Норов иштирок этиб, илм-фан ва инновацияларни ривожлантириш борасида амалга оширилаётган ислоҳотлар ҳамда уларнинг натижалари ҳақида сўз юритди.
Қайд этилишича, молиялаштирилаётган лойиҳалар иқтисодиёт ва саноатни ривожлантириш, аҳоли турмуш сифатини яхшилаш, соғлиқни сақлаш, атроф-муҳитни муҳофаза қилиш ҳамда Ўзбекистоннинг халқаро илмий майдондаги нуфузини оширишга қаратилган.
Тадбирда илм-фан, таълим, ишлаб чиқариш ва инновациялар интеграциясини кучайтириш давлат сиёсатининг устувор йўналишларидан бири экани таъкидланди. Шу боис грант асосида қўллаб-қувватланаётган лойиҳалар нафақат илмий янгилик яратиши, балки амалий натижа бериши, замонавий технологиялар ва инновацион ечимлар орқали мамлакат тараққиётига хизмат қилиши зарурлиги қайд этилди.
Грант сертификатларини топшириш маросимида Агентлик директорининг Маънавият ва давлат тили масалалари бўйича маслаҳатчиси У. Ташкенбаев ҳам иштирок этди. Сўзга чиққанлар давлат илмий дастурлари доирасидаги танловлар илмий салоҳиятни қўллаб-қувватлаш, истиқболли ишланмаларни амалиётга жорий этиш ва ўзбекистонлик олимларнинг халқаро майдондаги рақобатбардошлигини оширишда муҳим ўрин тутаётганини таъкидлади.
Тадбир давомида Умумий ва ноорганик кимё институти вакили, "Олима аёл" танлови ғолиби Дилноза Жумаева ҳам бугунги кунда илм-фан соҳасида яратилаётган имкониятларни юқори баҳолади. Унинг таъкидлашича, замонавий лабораториялар, грант дастурлари ва ёш олимларни қўллаб-қувватлаш тизими илмий изланишлар самарадорлигини оширишга хизмат қилмоқда.
Тақдирлаш маросими грант ғолибларига келгуси илмий фаолиятида муваффақиятлар тилаш билан якунланди.
