Ҳамас тўлиқ қуролсизланишга рози бўлди — Трамп

 

АҚШ президенти Доналд Трамп Ғазодаги Ҳамас ҳаракатини тўлиқ қуролсизлантириш бўйича “тарихий келишув”га эришилганини маълум қилди. Унинг таъкидлашича, мазкур келишув узоқ муддатли тинчлик ва хавфсизликни таъминлаш йўлидаги муҳим қадам ҳисобланади.

 

Трампнинг Truth Social платформасида ёзишича, келишув нафақат Ҳамас, балки Ғазодаги бошқа қуролли гуруҳларнинг ҳам қуролсизланишини назарда тутади. Шунингдек, ҳужжатга кўра, Ғазо сектори янги Фаластин маъмурияти томонидан бошқарилиши, Исроил эса хавфсизлик кафолатларига эга бўлиши кўзда тутилган.

 

АҚШ президенти қуролсизланиш жараёни давомида Исроил қўшинлари босқичма-босқич ҳудудни тарк этишини, хавфсизликни эса халқаро барқарорлаштириш кучлари ва янги Фаластин полицияси биргаликда таъминлашини билдирди.

 

Трамп воситачилик қилган Миср, Қатар ва Туркияга миннатдорлик билдириб, “7-октабр воқеалари каби таҳдидлар қайта такрорланмаслиги керак”лигини таъкидлаган.

 

Бироқ, Ҳамас ҳозирча АҚШ президентининг баёнотини расман тасдиқламаган. Al Jazeera телеканали ҳаракат ҳали расмий изоҳ бермаганини, Axios нашри эса Оқ уй яқин кунларда тегишли битим имзоланишини кутаётганини хабар қилган.