Аҳоли фойдаланадиган ҳудудлар қурилиш майдонига айлантирилмаслиги керак — Саида Мирзиёева
Президент Администрацияси раҳбари пойтахтдаги жамоат ҳудудлари, болалар майдончаси ва яшил ҳудудлар сақланиши зарурлигини таъкидлади.
Президент Администрацияси раҳбари Саида Мирзиёева Тошкент шаҳрининг Миробод туманидаги «Лолазор» маҳалласида кузатилган ҳолат юзасидан муносабат билдирди.
Қайд этилишича, аҳоли фойдаланиши учун ажратилган ҳудудлар офис ёки турар жой биноларини қуриш учун эмас, балки ўзининг асл вазифасига мувофиқ жамоат манфаатларига хизмат қилиши лозим.
Саида Мирзиёеванинг таъкидлашича, маҳаллага ташриф давомида фуқаролар томонидан экилган дарахтлар кесиб ташлангани, болалар майдончаси ўрнида эса бизнес маркази қурилиши режалаштирилаётгани аниқланган. Маҳалла аҳолиси эса бундай қурилишлар оқибатида умумий ҳовлилар, болалар ўйин майдончалари ва спорт иншоотлари босқичма-босқич йўқолиб бораётганидан хавотир билдирган.
Шу муносабат билан Бош прокуратурага Тошкент шаҳри бўйича жамоат фойдаланишидаги ҳудудлар ва шунга ўхшаш объектларни тўлиқ инвентаризациядан ўтказиш топширилди.
Текширувлар давомида қурилишларга берилган рухсатномаларнинг қонунийлиги, шаҳарсозлик меъёрларига риоя этилгани ҳамда аҳоли манфаатлари қай даражада инобатга олингани ўрганилади.
Таъкидланишича, қонунбузарлик ҳолатлари аниқланса, масъул шахсларга нисбатан қатъий ҳуқуқий чоралар кўрилади. Зарурат туғилганда айбдорлар жиноий жавобгарликка, жумладан, озодликдан маҳрум этиш жазоси билан ҳам жавоб бериши мумкин.
