Францияда ўрмон ёнғинлари сабаб 275 киши ҳибсга олинди
Мамлакатда юз берган 10 та ёнғиндан 9 таси инсон омили сабабли келиб чиққан.
Францияда ўрмон ёнғинларини келтириб чиқарганликда гумонланаётган 275 киши қўлга олинди. Бу ҳақда мамлакат ички ишлар вазири Лоран Нунез маълум қилди.
Унинг билдиришича, қўлга олинганлардан 31 нафарига нисбатан расмий айблов эълон қилинган. Вазирнинг таъкидлашича, Францияда юз берган 10 та ёнғиндан 9 таси инсон омили сабабли келиб чиққан.
Расмий маълумотларга кўра, 2026 йил бошидан буён мамлакатда ўрмон ёнғинлари 117 минг гектардан ортиқ ҳудудни кулга айлантирган. Энг оғир вазият Франциянинг Жиронд департаментида кузатилмоқда. Бу ерда ёнғинлар қарийб 42 минг гектар ўрмонни қамраб олиб, 200 мингдан ортиқ аҳоли эвакуация қилинган.
Шунингдек, пойтахт яқинидаги машҳур Фонтенбло (Fontainebleau) ўрмонида ҳам яна бир ёнғин содир бўлиб, у 6 гектар майдонни қамраб олган. Ёнғинни ўчириш ишларига юзга яқин ўт ўчирувчи жалб этилган.
Иссиқ об-ҳаво ва қурғоқчилик туфайли Франциянинг 21 та департаментида тўқ сариқ даражадаги об-ҳаво хавфи эълон қилинган. Расмийлар фуқароларни ёнғин хавфсизлиги қоидаларига қатъий риоя қилишга чақирмоқда.
