“Хоразм гуручи” географик кўрсаткич сифатида давлат рўйхатидан ўтказилди
Янги мақом маҳсулот номининг ҳуқуқий ҳимоясини таъминлаб, ундан ноқонуний фойдаланишнинг олдини олишга хизмат қилади.
Адлия вазирлигида “Хоразм гуручи” географик кўрсаткич сифатида давлат рўйхатидан ўтказилди. Мазкур қарор маҳсулот номининг ҳуқуқий ҳимоясини таъминлаш, унинг келиб чиқиши ва сифатини кафолатлаш ҳамда миллий бренд сифатида ривожлантиришга хизмат қилади.
Вазирлик маълумотига кўра, Хоразм воҳасида етиштириладиган гуруч ўзининг юқори сифати, хушбўйлиги ва ўзига хос пишириш хусусиятлари билан ажралиб туради. Маҳсулотнинг бундай сифат кўрсаткичлари Амударё сувлари, унумдор тупроқ, ҳудуднинг қулай иқлими ҳамда авлоддан-авлодга ўтиб келаётган анъанавий деҳқончилик тажрибаси билан чамбарчас боғлиқ.
“Хоразм гуручи”нинг географик кўрсаткич сифатида давлат реестрига киритилиши маҳсулот номидан ноқонуний фойдаланишнинг олдини олади, унинг келиб чиқиши ва сифатини ҳуқуқий жиҳатдан ҳимоя қилади ҳамда истеъмолчиларга маҳсулотнинг ҳақиқийлиги бўйича кафолат яратади.
Шунингдек, мазкур мақом Хоразм вилоятининг қишлоқ хўжалиги салоҳиятини янада ошириш, миллий брендни ривожлантириш ва маҳсулотни ички ҳамда халқаро бозорларда кенг тарғиб этиш учун муҳим аҳамият касб этади.
Маълумот учун, географик кўрсаткич — маҳсулотнинг муайян ҳудудга мансублигини тасдиқловчи интеллектуал мулк объекти бўлиб, унинг сифати, обрўси ва ўзига хос хусусиятлари айнан шу ҳудуднинг табиий-иқлимий ҳамда ижтимоий-маданий омиллари билан боғлиқ эканини англатади.
