Йўл ҳақини тўламаган йўловчилардан қарийб 2 млрд сўм жарима ундирилди
Жорий йил бошидан буён Тошкент автобусларида чиптасиз юрган 79 618 нафар йўловчига нисбатан маъмурий баённома расмийлаштирилди.
2026 йил бошидан буён Тошкент шаҳри автобусларида 79 618 нафар чиптасиз йўловчига нисбатан маъмурий баённома расмийлаштирилиб, уларга жами қарийб 2 миллиард сўм миқдорида жарима қўлланилган.
“Тошкент шаҳар йўловчи ташишни мониторинг ва назорат қилиш” давлат муассасаси маълумотига кўра, жамоат транспортида тўлов интизомини таъминлаш мақсадида мунтазам назорат-рейд тадбирлари ўтказилмоқда.
Аниқланган ҳуқуқбузарликлар бўйича Маъмурий жавобгарлик тўғрисидаги кодексининг 144-моддаси 5-қисми асосида маъмурий баённомалар расмийлаштирилган. Ҳар бир қоидабузарга базавий ҳисоблаш миқдорининг ўндан бир қисми — 41 минг 200 сўм миқдорида жарима белгиланган.
Мутасаддилар таъкидлашича, жамоат транспорти тизимининг барқарор ишлаши йўлкира тушумларига бевосита боғлиқ.
