Наманганда яширин омборхонадан 28 мингдан ортиқ сертификатсиз дори воситаси аниқланди
Уларнинг қиймати 1,4 миллиард сўмга баҳоланмоқда.
Давлат хавфсизлик хизмати, Божхона қўмитаси ҳамда Ички ишлар органлари ходимлари ҳамкорлигида ўтказилган тезкор тадбир давомида Наманган шаҳрида йирик ноқонуний дори воситалари омбори фош этилди. Бу ҳақда ДХХ хабар берди.
Тезкор тадбирда Наманган шаҳрида яшовчи 2003 йилда туғилган фуқаронинг яшаш манзили кўздан кечирилган. Натижада хонадонда ташкил этилган яширин омборхонадан хорижда ишлаб чиқарилган, тегишли сифат сертификатига эга бўлмаган 28 турдаги 28 928 дона дори воситаси аниқланиб, процессуал тартибда расмийлаштириб олинган.
Мусодара қилинган дори воситалари орасида «Ортофен», «Нейрокс», «Тирозол», «Сиофор» ва бошқа турдаги препаратлар мавжуд.
Дастлабки ҳисоб-китобларга кўра, мамлакат ҳудудига ноқонуний йўллар билан олиб кирилган ушбу дори воситаларининг умумий қиймати 1 миллиард 400 миллион сўмни ташкил этади.
Ҳозирда мазкур дори воситалари юзасидан экспертиза тайинланган бўлиб, ҳолат бўйича суриштирув ишлари давом эттирилмоқда.
