Президент Шавкат Мирзиёев темир йўл транспорти соҳаси ходимларини касб байрами билан табриклади

Президент Шавкат Мирзиёев Темир йўл транспорти ходимлари куни муносабати билан йўллаган табригида Ўзбекистон темир йўл тизимини модернизация қилиш ишлари давом этишини билдириб, яқин йилларда юзлаб замонавий йўловчи вагонлари ва юқори технологик поездлар харид қилинишини маълум қилди.

 

Президентнинг таъкидлашича, сўнгги йилларда темир йўл транспорти соҳасида амалга оширилган ислоҳотлар натижасида 2 минг 400 километрдан ортиқ янги темир йўл тармоқлари қурилиб фойдаланишга топширилди, 3 минг километрдан зиёд йўллар электрлаштирилди ҳамда 1 минг 100 километрдан ортиғи реабилитация қилинди.

 

Давлат раҳбари Самарқанд–Ургут, Байтқўрғон–Паркент ва Урганч халқаро аэропорти–Хива темир йўл тармоқлари барпо этилгани, Навоий–Бухоро участкасининг иккинчи электрлаштирилган линияси ишга туширилганини қайд этди. Шунингдек, Мароқанд–Навоий, Бухоро–Урганч–Хива, Мискин–Нукус ва Қумқўрғон–Қудуқли йўналишларини электрлаштириш ишлари давом этаётгани билдирилди.

 

Шавкат Мирзиёев мамлакатни халқаро транспорт йўлаклари билан боғлайдиган Хитой–Қирғизистон–Ўзбекистон темир йўли қурилиши ҳамда Афғонистон билан темир йўл инфратузилмасини ривожлантириш бўйича ҳамкорлик Ўзбекистоннинг минтақавий транспорт ва транзит маркази сифатидаги мавқеини мустаҳкамлаётганини таъкидлади.

 

Президент, шунингдек, Жанубий Кореянинг Hyundai Rotem компанияси томонидан ишлаб чиқарилган янги юқори тезликдаги "Жалолиддин Мангуберди" электропоезди Тошкент–Хива–Тошкент йўналишида қатновни бошлаганини эслатди.

 

Давлат раҳбари яқин йилларда юзлаб замонавий йўловчи вагонлари ва юқори технологик поездлар харид қилиниши, темир йўл инфратузилмаси кенгайтирилиши, вокзаллар модернизация қилиниши ҳамда соҳада рақамли технологиялар ва сунъий интеллект имкониятлари кенг жорий этилишини маълум қилди.

 

Сўзининг якунида Президент темир йўл транспорти соҳаси ходимларини касб байрами билан табриклаб, уларга сиҳат-саломатлик, оилавий бахт ва меҳнат фаолиятида муваффақиятлар тилади.