Россияда бензин экспортига қўйилган тақиқ яна узайтирилди
Гуманитар ёрдам мақсадида хорижий давлатларга ёқилғи экспорти халқаро ҳукуматлараро келишувлар асосида амалга оширилади.
Россия ҳукумати ички ёқилғи бозорида барқарорликни сақлаш мақсадида бензин экспортига қўйилган вақтинчалик тақиқ муддатини яна олти ойга узайтирди.
Ҳукумат қарорига кўра, 2027 йил 1 августдан 31 январгача бензин, дизель ёқилғиси, денгиз ёқилғиси ва газ мойи экспортига нисбатан вақтинчалик чекловлар амал қилади.
Шу билан бирга, 1 cентябрдан бошлаб чекловлар Россиядаги ишлаб чиқарувчилар томонидан экспорт қилинадиган дизель ёқилғиси, денгиз ёқилғиси ва газ мойига татбиқ этилмайди. Шунингдек, халқаро ҳукуматлараро келишувлар асосида хорижий давлатларга гуманитар ёрдам кўрсатиш учун ёқилғи экспортига рухсат берилади.
Ҳукумат қишлоқ хўжалиги ишлаб чиқарувчиларини ёқилғи билан узлуксиз таъминлаш мақсадида 1 ноябргача Энергетика вазирлиги, Қишлоқ хўжалиги вазирлиги, ҳудудий ҳокимликлар ва нефть компаниялари ўртасида махсус таъминот тартибини ҳам жорий этди.
Бундан ташқари, давлат ва муниципал муассасалар учун мотор ёқилғисини харид қилиш бўйича махсус нарх белгилаш қоидалари 2026 йил охиригача тўхтатилди. Бу ёқилғи харидларини умумий тартиб асосида амалга ошириш ҳамда биржа нархларидаги ўзгаришлар сабаб таъминот узилишларининг олдини олишга хизмат қилади.
Россия ҳукумати мазкур чоралар ички бозорда ёқилғи таъминотини барқарорлаштириш ва нархлар кескин ошиб кетишининг олдини олишга қаратилганини таъкидлади.
