Самарқандда пулга муҳтож аёлларни чет элга юбораётган 21 ёшли қиз ушланди
У бир аёлни Россияга жўнатишга уринган вақтида ашёвий далиллар билан ушланган.
Самарқанд халқаро аэропортида одам савдоси билан боғлиқ жиноятда гумон қилинаётган қиз қўлга олинди. Бу ҳақда Навоий вилояти Ички ишлар бошқармаси маълум қилди.
Қайд этилишича, "Хавфсиз ва соғлом юрт" кенг қамровли тезкор-профилактик тадбирлари давомида 2005 йилда туғилган Жиззах вилояти фуқароси пулга муҳтож аёлларни алдов йўли билан чет давлатларга фоҳишалик мақсадида юборишга уринган.
Тезкор тадбир давомида у Хатирчи туманида яшовчи аёлни Россияга жўнатиш учун йўл харажатларини ўз зиммасига олиб, уни кузатаётган вақтида Самарқанд халқаро аэропортида қўлга олинган. Ҳолат юзасидан олинган авиачипталар процессуал тартибда ашёвий далил сифатида расмийлаштирилган.
Мазкур ҳолат юзасидан гумонланувчига нисбатан Ўзбекистон Республикаси Жиноят кодексининг 135-моддаси иккинчи қисми (одам савдоси) билан жиноят иши қўзғатилиб, тергов ҳаракатлари олиб борилмоқда.
