Тошкентда мансабдорлар қарийб 20 млрд сўмлик буджет маблағларини талон-торож қилди
"Ҳудудгазтаъминот" ва "Технопарк" мансабдорларига нисбатан жиноят иши қўзғатилди.
Бош прокуратура ҳузуридаги Иқтисодий жиноятларга қарши курашиш департаменти томонидан ўтказилган терговга қадар текширув давомида «Ҳудудгазтаъминот» АЖ ва «Технопарк» МЧЖ мансабдор шахслари иштирокида 19,9 миллиард сўмлик буджет маблағларини талон-торож қилиш ҳолати аниқлангани маълум қилинди.
Дастлабки маълумотларга кўра, масъул шахслар ўзаро тил бириктириб, гўёки электрон газ ҳисоблагичларига техник хизмат кўрсатиш ишлари амалга оширилганини расмийлаштириш орқали 19 миллиард сўм буджет маблағларини ўзлаштириш ёки растрата қилиш йўли билан талон-торож қилганликда гумон қилинмоқда.
Текширув давомида яна бир қонунбузарлик ҳолати ҳам аниқланган. Хусусан, «Технопарк» МЧЖ томонидан ишлаб чиқарилган ва «Ҳудудгазтаъминот» АЖ томонидан истеъмолчиларга ўрнатилган 273 дона газ ҳисоблагичининг кўрсаткичлари амалдагидан кам ҳисоблагани аниқланган.
Мазкур ҳолат оқибатида давлат ва жамият манфаатларига 861,1 миллион сўм миқдорида зарар етказилгани қайд этилди.
Ҳозирда ушбу ҳолат юзасидан Жиноят кодексининг тегишли моддалари билан жиноят иши қўзғатилган бўлиб, барча ҳолатларни аниқлашга қаратилган тергов ҳаракатлари олиб борилмоқда.
