Марказий Осиё ва Озарбайжон ягона тараққиёт маконини шакллантириши зарур — Шавкат Мирзиёев
Ўзбекистон Президент Марказий Осиё мамлакатлари ва Озарбайжоннинг минтақавий ҳамкорлигини ривожлантириш истиқболларини белгилаб берди.
Мирзо Улуғбек туманида ёлғиз яшовчи кекса аёлнинг ҳолати юзасидан ўтказилган хизмат текшируви якунларига кўра, унга ўз вақтида зарур ёрдам кўрсатмаган масъуллар лавозимидан озод этилди.
Ижтимоий ҳимоя миллий агентлиги маълум қилишича, ижтимоий тармоқларда Мирзо Улуғбек тумани “Ҳабиб Абдуллаев” маҳалласида яшовчи фуқаро Л. Журавлёванинг яшаш шароити акс этган видеомурожаат юзасидан ҳолат назоратга олиниб, жойида ўрганиш ишлари олиб борилган.
Аниқланишича, фуқаро 2026 йил 11 июндан бошлаб уй шароитида ижтимоий-маиший хизмат олиш учун ваучер билан таъминланган ва ҳафтасига тўрт маротаба хизмат кўрсатиб келинган. Шу билан бирга, тиббий хулосага кўра, у когнитив бузилишлар, томирли деменция, 2–3-даражали дистсиркулятор энцефалопатия ҳамда тарқоқ остеохондроз касалликларидан азият чекаётгани тасдиқланган.
Қўшимча текширувлар давомида фуқаро мустақил равишда овқатлана олмаслиги, кундалик эҳтиёжларини ўзи қондира олмаслиги, шунингдек, ёлғиз қолганида ўзига ва атрофдагиларга хавф туғдириши мумкинлиги аниқланган.
Шундан сўнг фуқаро доимий парваришга муҳтож деб топилиб, Ижтимоий қўллаб-қувватлаш марказига жойлаштирилган. Ҳозирда унга 24 соатлик тиббий ва ижтимоий парвариш хизмати кўрсатилмоқда.
Хизмат текшируви якунида туман «Инсон» ижтимоий хизматлар маркази ҳамда туман тиббиёт бирлашмаси масъул ходимлари фуқаронинг соғлиғи оғирлашаётганини ўз вақтида аниқламагани ва доимий парвариш заруратини белгиламаганлиги сабабли эгаллаб турган лавозимидан озод этилди.
