Ўзбекистонга салқин ҳаво кириб келмоқда
Дам олиш кунларидан бошлаб ҳаво ҳарорати босқичма-босқич пасая бошлайди.
Дам олиш кунларидан бошлаб Ўзбекистонда ҳаво ҳарорати босқичма-босқич пасайиши кутилмоқда. Бу ҳақда «Ўзгидромет» хабар берди.
Маълумотга кўра, 31 июль куни республика ҳудудида иссиқ об-ҳаво сақланиб қолади. Кундузи ҳаво ҳарорати 38–41 даража, шимолий, жанубий ва чўл ҳудудларда эса 42–43 даражагача кўтарилади. Бу кўрсаткич июль охири ва август бошидаги иқлимий меъёрдан 2–4 даражага юқори бўлади.
1–2 август кунлари иссиқ об-ҳаво республиканинг аксарият ҳудудларида давом этади. Фақат шимоли-ғарбий вилоятларда ҳароратнинг пасайиши бошланади. Ушбу кунларда асосан кам булутли об-ҳаво кузатилади, ёғингарчилик кутилмайди.
Прогнозларга кўра, келаси ҳафтадан салқин ҳаво оқими республиканинг барча ҳудудларини қамраб олиб, ҳарорат босқичма-босқич пасаяди.
Шунингдек, айрим ҳудудларда шамол тезлиги 13–18 метр/секундгача кучайиши, айрим жойларда эса чанг-тўзонлар кузатилиши мумкин.
Тошкент шаҳрида ҳам 31 июль – 2 август кунлари ёғингарчилик кутилмайди. Кундузи ҳаво ҳарорати 37–40 даража, кечаси эса 23–26 даража атрофида бўлади.
«Ўзгидромет» прогнозига кўра, август ойининг бошидан республика ҳудудига нисбатан салқин ҳаво массаси кириб келиши натижасида кундузги ҳарорат 25–30 даражагача пасайиши кутилмоқда.
