450 нафардан ортиқ ходим Тошкентда энергия хавфсизлигини таъминлашга жалб этилди
Энергия ресурсларидан ноқонуний фойдаланиш ҳолатларига қарши “Энергетика хавфсизлиги ойлиги” бошланди.
Тошкент шаҳрида энергия ресурсларидан ноқонуний фойдаланиш ва уларни беҳуда сарфлаш ҳолатларининг олдини олишга қаратилган «Энергетика хавфсизлиги ойлиги» бошланди.
Мазкур тадбирлар доирасида 450 нафардан ортиқ ходимдан иборат кучайтирилган ишчи гуруҳлар фаолият бошлади.
31 июль куни Юнусобод туманида ўтказилган йўриқномада Тошкент шаҳар прокурори, Ички ишлар бош бошқармаси бошлиғи ҳамда шаҳар ҳокими ўринбосари томонидан масъулларга устувор вазифалар белгилаб берилди.
Хусусан, Президент қарорига мувофиқ энергия самарадорлигини ошириш, электр ва табиий газдан ноқонуний фойдаланиш ҳолатларининг олдини олиш, йирик талон-торож ҳолатларини аниқлаш ҳамда ресурслар йўқотилиши юқори бўлган ҳудудларда назорат тадбирларини кучайтириш режалаштирилган.
Шунингдек, электрон мониторинг тизимлари орқали ҳисоблагичига ташқи таъсир ўтказилгани ёки алоқага чиқмаётгани аниқланган истеъмолчилар манзилли равишда ўрганилади.
Мутасаддиларга кўра, мазкур тадбирлар энергия ресурслари талон-торож қилинишининг олдини олиш ҳамда ҳалол истеъмолчиларни электр ва табиий газ билан барқарор таъминлашга хизмат қилади.
