“Ҳақингизни талаб қилинг” — Энергетика вазири тадбиркорларга мурожаат қилди
Энергетика вазири электр ва газ тармоқларига уланиш бўйича хизматни илтимос эмас, қонуний равишда талаб қилиш ҳуқуқига эга эканини таъкидлади.
Янгийўл туманида Энергетика вазири Шерзод Ходжаев ҳамда туман ҳокими Санъатбек Жуманиязов иштирокида тадбиркорлик субъектлари вакиллари билан очиқ мулоқот ўтказилди.
Учрашувда 27 нафар тадбиркор электр энергияси ва табиий газ таъминоти, тармоқлардаги узилишлар, ёз ойларида электр қуввати ва қиш мавсумида газ босимининг етарли эмаслиги, техник шарт олиш, энергия ресурслари бўйича қарздорлик ҳамда бошқа долзарб масалалар юзасидан мурожаат ва таклифларини билдирди.
Мулоқот давомида мурожаатларнинг бир қисми жойида ҳал этилди. Қўшимча ўрганишни талаб қиладиган масалалар бўйича масъулларга аниқ топшириқлар берилиб, айрим мурожаатлар юзасидан жойига чиқиб ўрганиш ўтказилиши белгиланди.
Шунингдек, электр ва газдан ноқонуний фойдаланиш ҳолатлари бўйича қўлланилган молиявий санкцияларни бекор қилиш ёки камайтириш Энергетика вазирлиги ваколатига кирмаслиги, бундай масалалар амалдаги қонунчиликка мувофиқ суд тартибида кўриб чиқилиши мумкинлиги тушунтирилди.
Вазир тадбиркорларга электр ва газ тармоқларига уланиш учун техник шартлар фақат Давлат хизматлари марказлари ёки my.gov.uz портали орқали расмийлаштирилишини эслатиб, бу масалаларни норасмий йўл билан ҳал этишга уринмасликка чақирди.
Шунингдек, тизим ходимлари томонидан ноқонуний манфаат талаб қилинган ҳолатлар аниқланса, бу ҳақда Энергетика вазирлиги ёки ҳуқуқни муҳофаза қилувчи органларга мурожаат қилиш сўралди. Бундай ҳолатларга нисбатан қатъий чоралар кўрилиши қайд этилди.
Учрашувда Энергетика вазири Шерзод Ходжаев тадбиркорларга шундай мурожаат қилди:
«Ҳамма ҳужжатингиз тўғри бўлса, сиз “Электр тармоқлари”дан илтимос қилманг, талаб қилинг. Бунга тўлиқ ҳаққингиз бор».
Маълум қилинишича, тадбиркорлар билан бундай очиқ мулоқотлар давом эттирилади. Ҳозирда Янгийўл тумани ва яна 14 та ҳудудда махсус штаблар фаолият юритмоқда.
