Андижонда 21 нафар болани боғчага олиб кетаётган Tracker ЙТҲга учради, бир бола ҳалок бўлди
Ҳодисада 8 нафар бола жароҳатланган, оғир аҳволда шифохонага ётқизилган 6 ёшли қизалоқ тўрт кун ўтиб вафот этган.
Андижон вилоятининг Хўжаобод туманида 21 нафар болани хусусий боғчага олиб кетаётган Tracker автомобили йўл-транспорт ҳодисасига учраши оқибатида 6 ёшли қизалоқ вафот этгани маълум бўлди.
Суд ҳужжатларига кўра, ҳодиса жорий йил 21 февраль куни эрталаб «Хўжаобод–Бобур» автомобиль йўлида содир бўлган. 40 ёшли аёл бошқарувидаги Tracker автомобилида 21 нафар бола хусусий боғчага олиб кетилаётган вақтда ҳайдовчи транспорт воситаси бошқарувини йўқотиб, йўл четидаги бетон устунга урилган.
Йўл-транспорт ҳодисаси оқибатида 8 нафар бола турли даражадаги тан жароҳатлари олган. Улар орасида оғир аҳволда шифохонага ётқизилган 6 ёшли қизалоқ кўрсатилган тиббий ёрдамга қарамай, тўрт кун ўтиб вафот этган.
Суд жараёнида ҳайдовчи автомобилга 21 нафар болани, жумладан, юкхона (багаж) қисмига ҳам жойлаштирганини тан олган. Унинг айтишича, чап томондан юқори тезликда ҳаракатланган автомобилни кўриб чўчиб кетгани сабаб бошқарувни йўқотган ва машина бетон устунга бориб урилган. Аёл 2-гуруҳ ногирони эканини билдириб, суддан енгиллик сўраган.
Мазкур ҳолат юзасидан аёл Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш оқибатида одам ўлимига сабаб бўлиш) билан айбдор деб топилган.
Суд ҳукмига кўра, унга 2 йил муддатга транспорт воситаларини бошқариш ҳуқуқидан маҳрум қилиш ҳамда 3 йил муддатга озодликни чеклаш жазоси тайинланган.
