Эрдоғанга суиқасд уюштиришни режалаштирган шахс қўлга олинди
Гумондор 10 йилдан бери қидирувда бўлган.
Туркияда 2016 йилги давлат тўнтаришига уриниш вақтида Президент Ражаб Тоййиб Эрдоғанга суиқасд уюштиришни режалаштирганликда гумон қилинаётган шахс қўлга олинди.
Туркия Ички ишлар вазирлиги маълумотига кўра, мамлакат разведка ва хавфсизлик хизматлари томонидан ўтказилган махсус операция давомида 10 йилдан буён қидирувда бўлган Буркай Каратэпе Афёнкараҳисар вилоятида қўлга олинган.
Расмийларга кўра, у Туркияда террорчилик ташкилоти деб эълон қилинган ФEТО билан алоқадор бўлиб, 2016 йил 15 июль куни Мармарис шаҳрида Президент Ражаб Тоййиб Эрдўғанга суиқасд уюштиришни режалаштирган гуруҳ таркибида бўлган. Маҳаллий ОАВ хабарларига кўра, у вертолёт учувчиси сифатида фаолият юритган.
TRT Haber телеканали маълумотига кўра, мазкур иш доирасида илгари суиқасдни режалаштиришда гумон қилинган 36 нафар собиқ ҳарбий хизматчи қўлга олинган. Буркай Каратэпенинг ушланиши билан ушбу гуруҳнинг қидирувда қолган сўнгги аъзоси ҳам ҳибсга олингани айтилмоқда.
Туркия ОАВнинг аввалги хабарларига кўра, суиқасд режаси Мармарисдаги меҳмонхонада амалга оширилиши кўзланган, бироқ Президент Эрдўғаннинг меҳмонхонани режалаштирилганидан олдин тарк этгани сабабли уриниш муваффақиятсиз якунланган.
Эслатиб ўтамиз, 2016 йил 15 июлдаги давлат тўнтаришига уриниш оқибатида 253 киши ҳалок бўлган, 2 200 дан ортиқ киши жароҳатланган. Тўнтариш бостирилгач, Туркияда кенг кўламли тергов ишлари олиб борилиб, минглаб шахслар жавобгарликка тортилган ҳамда юзлаб гумондорлар умрбод озодликдан маҳрум этилган.
